Rinliana Sailo a tlin chuan Dy CM dawn!; Aizawl leh Mamit-ah Bru House sak tum!

Aizawl | October 21, 2023: Vawiin 21st Oct 2023 hian BJP Official Candidate Pu Lalrinliana Sailo leh Nagaland Deputy CM te chuan Nalzawl Khua tlawhin Public Meeting an nei a, BJP zawm thar lawmluhna an nei bawk.

He huna thusawi tu Nagaland Dy CM Pu Y Patton chuan thusawiin, Mamit bial hi bial vannei tak in ni a, Pu Lalrinliana Sailo politics-a palian takin a bial che u hi in vânnei takzet a, hetihlai hian Pu Modi-a chuan Mamit district asprinational district a nih bawk avangin a ngai pawimawh a, BJP candidate hi Pu Modi-a pawhin a rin ngam êm êm a, in thleng tling a nih chuan in tan malsawmna ṭha tak a ni dawn a ni. 

Party dangte hian BJP anti-christian anga an chhuahchhal ziah hi a diklo hle a, Israel leh Hamas indona ah pawh Pu Modi-a chuan Kristian hmun thianghlim venghim turin hma a la zawk a ni. Kristian pa ka ni a, sakhuana lamah harsatna ka tâwk ngai lo a, tun hma aṭang tawhin BJP chuan tualṭo party kan lo thawhpui sakhuana leh kristianna ah buaina kan tâwk ngailo. Kum upa lam ni tawh mah ila BJP Minister ka nih hian ka taksa leh rilru te a ṭhalai zual sauh a, hnathawk tur pawhin ka peih reng a ni. Pu Lalrinliana Sailo hi in thlan tlin chuan keimah angin in fit takin leh ṭhalai riltu pu takin a thawk thei dawn a, in vannei hle a, hmasâwnna in duh ang in nei thei ngei ang.

BJP hi sawrkarna ah kan tel ngei dawn a, Pu Lalrinliana Sailo pawh hi keimah anga Deputy CM dinhmun chelh thei tur a ni dawn a, Deputy CM bial nih hi thil chakawm tak a ni, kawng chhe tak hi siam ṭhat thuai a ni dawn a, Pu Lalrinliana Sailo hi in thlang tling a nih chuan Krismas hmang turin Mamit bialah hian ka lo kal leh ang.

Lalrinliana Sailo chuan, Nalzawl khuain, khaw kawng chhia in la nei hi a pawi takzet a ni, a chhiat dan êm êm hi ka rin phakbak a ni,  tuna in khaw kawng hi min thlang tling a nih chuan thla 6 chhungin ka tender nghal ang. Hetiang khawpa sawrkarin an lo hnuchhawn che u hi a mak ka ti hle a ni. Bial ka lo enkawl tawhah chuan an khaw kawng ka blacktop vek a ni ati.

Pu Rinliana chuan BJP ka zawm chhan chu; kan ram, kan hnam, kan sakhua a him nan leh kan ramin hma a lo sawn leh zual zawk nana hma lak ka duh avanga zawm ka ni a. Min thlang tling a nih chuan, Aizawl ah leh Mamit ah Bru House kan sa anga, chu mi siam tur chuan Central Minister pawhin min thlawp thlap a ni. Tin, Eklavya School kan hawng bawk ang. 

Mamit District ah hian kan thusawite a tak tak a nih theih nan, tun 30th Oct hian Pu Modi-a Mamit ah  a rawn ṭum dawn, heti khawpa Central-in a duhsak che u hi keini tan hian alawmawm hle  a ni a ti.

Hmasâwnna hrang hrang awm thei mi retheite thleng phâk ni turin hma ka la dawn a. Aspirational District in ni mek a, hemi hi remchangah la in, hmasawnna tam tak thawh theih a awm a, Mamit Bial hmasâwnna tur hi ka duh ber chu a ni.

Manipur-a Zohnahthlâk te leh Meitei te kar buaina pawh hnam leh hnam inkar buaina a ni a, an inkar buaina a ziaawm theih nan hma lak a ni bawk. India khua leh tui nihna nei vek kan ni a, Pu Modi-a hian min hmangaih vek a ni. Congress hoin politics chhia ah kailekin BJP min dem nana remchang ah an hmang ta daih a ni. Congress hian hetiang puh chhiatna hi hmanglo se, heti khawp hian buaina a chhuah a rinawm loh hial a ni a ti. Kum 50 chhung tehmeuh mai Congress-in India ram a kaihruai tawh a, India ram chu khu tah min dah a, Pu Modi-a kaihhruai BJP sawrkarna hnuaiah erawh Khawvel economy lian Top 10-ah pa 5-na ah min hlangkai tawh a ni. Pu Modi-a chuan "Make In India" kalpuiin ram chhung aṭanga siam chhuah te chu ram pawnah a thawn chhuak hnem hle a, hetiang dinhmun hi kan ni thei tawh dawn a ni, Pu Modi-a sawrkar kaltlang hian Biak In, Sikul, Damdawiin mamawh te kanla sak sak zawk tawh dawn a ni a ti.

Pu Rina chuan Mizoram sum dinhmun sawiin, tûnah hian Financial Crisis kan nei mek a, hemi chhanchhuak tur in BJP hi kan mamawh tlat a ni. Tun anga kan kal zel a nih chuan kan ram hi a rethei hle tawh dawn a, mipui sawrkar dik tak kan neih theih nan BJP hi kan mamawh a ni. In kawng siam ṭhat nan, sikul ṭha in neih theih nan, tui connection ṭha in neih theih nan in mamawh ang hmasâwnna hrang hrangte hi min thlang tling anih chuan ka tihlawhtling vek ang. BJP sawrkarah hian corruption a leng ve lo a, Central Minister zingah corruption vanga thubuai an neih awm kan hrelo chu a nih hi.

Chuvangin tun ṭum chu Lotus ah hian lo chhu ve teh u, in chhu ngat a nih chuan inthlakdanglamna a thleng ang. Vawiinah heti zât in rawn kalkhawm hi ka lawm takzet a. Kei khawchhak pa hi Pathian hian khawtlang mi te'n hmasâwnna an hmuh ve theih nan a chawikangtuah min hman a tum a ni ngei ang. Hmuh theiin Development in hmu ang tih ka sawi duh a. Hetiang thu hi ka la sawi ngailo, tuna ka thuchah che u kha Central Minister-te'n in hnenah hrilh turin min ti a ni. Ṭawngṭaina nen khawngaih takin i ṭang ho ang u. Khawngaih takin min thlang tling ngei rawh u a ti bawk.

.