Aizawl | Oct 11, 2023: Central YMA huaihawtin Inthlan vote chhiar ni chungchangah NGO leh Political Party te thukhawm a, Vote chhiar ni sawn turin ECI ngen an tum.
Vawiin ni 11.10.23 chawhma dar 11 khan khan Central YMA huaihawtin Central YMA Committee Room ah NGO leh Political Party te an thukhawm a. Mizoram state Legislative Assembly inthlan vote chhiar ni atana Pathianni ruat a nih chungchang an sawiho. Meeting hi Pu R. Lalngheta, President, Central YMA in a kaihruai.
Meeting ah hian Election Commission of India( ECI) in Mizoram state Assembly inthlan vote chhiar ni atan December 3,2023(Pathianni) a ruat chu Kristian te ni serh leh Pathian biakna ni a nih avangin hemi ni a vote chhiar chu a remchan loh thu leh Pathianni leh Inrinni tih loh nidang ruat zawk tura ECI hnena ziaka thlen nise tiin an rel.
ECI hnena lehkha thawn tur ah hian NGO leh Political Party tin President in hming ziah nise an ti a. A lehkha copy hi Chief Electoral Officer ( CEO) , Mizoram pek ve pahin sawipui nise an ti bawk.
ECI in an ngenna a tihhlawhtling lova Pathianni hi a ti tlang dawn a nih chuan a tul anga hmalak dan tur ngaihtuah leh nise an ti bawk.
Meeting ah hian NGO hrang hrang - CYMA, MUP, MHIP, MZP, MSU leh Political party hrang hrang - AAP, BJP, INC, MNF, ZPM, ZNP aiawh mi 2 theuh an kal.
Post a Comment
He post chungchanga i ngaihdan lo sawi ve rawh: