Democracy palzut duh loh lantir nan AAP pungkhawm; PM Modi thlalak an hal!

Aizawl | Oct 7, 2023: AAP Mizoram chuan nimin khan India rama democracy pal zut duh lohna lantir in Vanapa Hall kawtah an pungkhawm a, India Prime Minister Narendra Modi thlalak an hal bawk.

He hunah hian AAP NE Incharge Pu Rajesh Sharma chuan thu sawiin, Modi a chuan India ram hi anti-democratic ramah a siam a, lalna chan ringawt an duh a, India ram hi min then hrang mek a ni a ti.

AAP Rajya Sabha MP Sanjay Singh an Manipur tan theihtawp a chhuah lai mek a, Modi leh Adani tangkawpin chhan nei miah lo a an man mai hi mak kan ti hle a, BJP lungrual taka do ho vek a nih chuan Democracy leh kan constitution kan hum him tihna a ni dawn a ni, a ti.

AAP Mizoram President Pu Andrew Lalremkima pawhin thusawiin, BJP sawrkar chuan Press Mite an lam ṭang nilo nia an hriat chu nasa takin an chhui zui a, buaina nasa tak siam in an nek chep mek a, mipui zalenna nasa takin an rap bet mek a ni a ti. Mipuite he kan rama leh sakhaw zalenna a awm zel theihna turin kan tanrual a ngai a, kan ramin hma a sawn theihna daltute chu do zel turin Mizo-te kan in chah duh a ni a ti bawk.