Aizawl | October 31, 2023: MNF General Secretary i/c Media & Publicity VL Krosahnehzova chuan vawiin khan Aizawl Press Club-ah thutharthehdarhtute kawmin, "BJP in MNF ralpui phiarin an phiar," a ti.
MNF GS chuan, "Assam nen ramria kan buaina ah MNF sorkarin huai taka dolet a, Silai hial hmehpuaha awmin, nunna chan hial an awm avangin BJP Sorkar, Assam Chief Minister Himanta leh a kaihhruai Party chuan MNF hi min do dawn tih a hriatsa a, Manipur-a kan unaute thlavang nasa taka MNF in a hauh mek avang hian Manipur Chief Minister, BJP rum rut leh a thurualpui te hian MNF sorkar paihthla tur leh ZPM tungding tur hian nasa takin chet an lak ngei pawh a rinawm," a ti bawk.
MNF General Secretary i/c Media & Publicity VL Krosahnehzova Press Statement kimchang.
1. Manipur buaina a Manipur BJP sorkarin Police leh Meitei firfiak - Arambai Tenggol leh Meetei Lipun te hmanga kan unaute nuai chimih an tum chu duh lovin MNF MP pahnih - Pu C. Lalrosanga (Lok Sabha) leh Pu K. Vanlalvena (Rajya Sabha)-te chuan Manipur-a kan unaute tawrhna chungchang Parliament-ah sawi chhuah an tum a. Vawi khat mah phalsak an ni lo. Chubakah NDA MP-te inhmuhkhawmna-ah pawh sawichhuah an remtih loh avangin a hnu lamah phei chuan NDA inhmuhkhawmnaah an tel loh phah.
2. Manipur chungchanga eptu tangrualin PM Narendra Modi kaihhruai NDA sorkar rintawk lohna (no-confidence motion) an putluh pawh Lok Sabha-ah Pu C. Lalrosanga chuan a thlawp.
3. Forest Conservation (amendment) bill, 2023 pawh kan MP pahnihte'n an dodal a. Chu mai ni lovin Mizoram Assembly-ah Environment, Forests & Climate Change Minister Pu TJ Lalnuntluanga'n FCA amendment bill dodalna official resolution a pulut a, hei hi kokim taka pawm (adopt) a ni. FCA amendment bill hi Mizoram leh hmarchhaka ramngaw tichereu thei dan siamthatna a nih vangin MNF chuan a dodal a ni.
4. Hnam hrang hrangin tihdan phung (culture, tradition & customs) kan neih leh kan sakhua ngei pawh dinhmun derthawnga siamtu tur Uniform Civil Code (UCC) hi MNF chuan a duh lova. Parliament chhung leh pawnah kan MP-te'n an dodal bakah kan CM/Party president ngei pawhin hemi chungchang ngaihtuahtu National Law Commission-ah Mizoram leh mipuiin an duh lova an dodal thu a thlen a. Political party zinga ziaka thlen hmasa ber a ni.
5. Party dangte'n MNF an sawiselna thin Citizen Amendment Bill kha kan MP-in a thlawp zawnga vote a thlak chhan chu BJP leh a thurualpui ten an MP ngahna hmangin an pass tho dawn tih hriat a ni a. Mizoram leh hmarchhak state-ah te hman a nih ve dawn loh thu tihchian a nih tak avang chauh a ni. Ni lovin a ngai ang ang kha chuan vote hmangin a dodal ngei ang.
6. Myanmar atanga an ram buai (sipaiin sorkarna an pawnglak avanga) kan unau raltlan rawn lutte chu sorkar laipui, NDA sorkar chuan thawnlet (deport/push back) vek turin Mizoram sorkar hnenah thu a rawn pe a. Mizoram sorkar chuan NDA sorkar thupek hi hnawlin, kan unaute chu Mizorama an lo luh phalsak mai pawh ni lovin kawng hrang hrangin a lo tuamhlawm a. Myanmar raltlan 30,000 chuang a enkawl mek a. State sorkar sum atangin Rs 380 lakh hmangin a lo tuamhlawm a ni. Bangladesh atanga kan unau rawn raltlan mi 1,000 vel pawh BSF-te'n an luh an phal lova Mizoram sorkarin an luh phal tura a tih avangin Mizoramah kan lo tuamhlawm mek a ni.
7. Manipur buai avanga mi 12,000 (an tam lai) rawn tlanchhiate tanpuina tan Mizoram sorkar chuan sorkar laipui hnenah Rs 10 crore a dil a. CM Pu Zoramthanga'n May ni 23 a dilna a thehluh a, thla 6 ral hnu-ah pawh central sorkar chuan a la pe chhuak duh lo. Mizoram sorkar erawh chuan ama sumbawm atangin Rs 5 crore hmangin Manipur atanga rawn tlanchhia kan unaute hi a tuamhlawm mek a. Sorkar hnathawk atanga vehbur khawnin chuta tling khawm Rs 81 lakh chuang pawh chumi atan tho chuan hman mek a ni. Manipur-a kan unaute thlavang hauha MNF in huai taka a chet ngam laiin, ZPM hian an tana thu leh hla an neih leh, tha leh zung an sen thawm hriat tur a awm mang hauh lo a ni.
8. NDA a MNF a tel ve chhan hi BJP nena inzawm vang ni lovin Congress duh leh duh lo intelkhawm pahniha Congress duh lo lama tel mai a ni a. NDA thuhnuai-ah a awm lova, issue-based zela kal a ni. Mizoram tana tha lo an tih chuan a dodal mai a, a dodal zel dawn bawk.
9. NDA kaihhruaitu BJP hian an duh duhin MNF leh Mizoram sorkar hi a ti thei lo tih an hriat chian tawh avangin tun inthlanpui lo awm turah hian MNF chu ralpui phiara phiarin na takin a bei ta a. An khingpui ber Congress chu inthlanna-ah eng ruai an ni dawn lo tih a hmuh avangin an bei lem lo. ZPM phei chu engtin mah an bei lova, sawisel zawngin tawng an cheh miah lo. Hei hian BJP leh ZPM hi puan an inzawna, hnungthak an inhiahtawn tih a tichiang hle. ZPM hruaitute hian BJP nen an thawkho dawn lo niin an sawi a. Inthlan hma-in langsar taka thawhho (pre-poll alliance) chu an nei lo reng a. Mahse, chanchinbumite'n inthlan zawhah sorkarna siam thei awm ta lo se, BJP an thawhpui ang em ti a Pu Lalduhoma an zawh chuan, inthlan hnu lam chu hunin a hrilh ang tih bakin a chhang duh lo a ni.
10. Sawi tawh angin MNF hi NDA-a a telna chhan chu anti-Congress alliance a nih vang chauh a ni a. A hranpa-in NDA lakah beisei a nei lo. BJP hruaitu lawkte'n na taka MNF an sawisel ta chiam chiam hian MNF dinhmun diktak a tarlang a. ZPM an sawichhe ve ngai miah lo hian BJP leh ZPM inkar chu bui-chhe-laih lohvin a puang mek zawk a ni e.
11. Assam nen ramria kan buaina ah MNF sorkarin huai taka dolet a, Silai hial hmehpuaha awmin, nunna chan hial an awm avangin BJP Sorkar, Assam Chief Minister Himanta leh a kaihhruai Party chuan MNF hi min do dawn tih a hriatsa a, Manipur-a kan unaute thlavang nasa taka MNF in a hauh mek avang hian Manipur Chief Minister, BJP rum rut leh a thurualpui te hian MNF sorkar paihthla tur leh ZPM tungding tur hian nasa takin chet an lak ngei pawh a rinawm. Tun hnai maia ZPM Candidate ten sum an uilo thar hle tih pawh a ri ring ta hle a. Mizo mipuite hian kan unau harsatna tawk mekte la tah vawng vawngna tur hian BJP leh a puanhnuai sangawizawnpuite hi kan vulh len palh kan hlau takzet a ni. MNF chuan Pathian leh kan Ram tan, tiin huai takin heng thachakna hi kan do mek a, kan do zel dawn bawk a ni. Kan ram, kan hnam leh kan Sakhua humhalha kan pen zel avang hian Kan Pathian hian kan lam hawiin a ban a phar kan ringnghet bur bawk a ni
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: