BJP in MLA Candidate tur puang; Speaker hlui Mamit-ah a ding dawn!

Aizawl | October 18, 2023: Mizoram MLA inthlan lo awm turah BJP-in MLA bial 40 zinga bial 12-a an candidate tur vawiin khan an puang a, bial dang pawh an la puan belh leh dawn nia thudawn a ni.

Bial 12-a candidate tur puan zingah Assembly Speaker hlui, tunhnaia BJP zawm ta Lalrinliana Sailo pawh telin, Mamit bialah a ding dawn.

BJP Mizoram State President Vanlalhmuaka chu Dampa bialah a ding ang a, BJP Mizoram State General Secretary Malsawmtluanga chu Hachhek bialah a ding thung ang. MNF atanga BJP zawm ta, Minister hlui Dr K. Beichhua chu Siaha bialah a ding dawn bawk.

BJP-in bial 12-a an candidate tur an puan te hi - Hachhek bial-ah Malsawmtluanga, Dampa bial-ah Vanlalhmuaka, Mamit bial-ah Lalrinliana Sailo, Serlui bial-ah Robinson Malsawmtluanga Hmar, Champhai North bial-ah PS Zatluanga , Hrangturzo bial-ah Lalmalsawma, Lunglei West bial-ah R. Lalbiaktluangi, Thorang bial-ah Shanti Bikash Chakma, West Tuipui bial-ah T. Lalengthanga, Tuichawng bial-ah Durjya Dhan Chakma, Siaha bial-ah Dr. K. Beichhua leh Palak bial-ah K. Hrahmo te an ni.