RINNA CHHAWNG SARIH I PALTLANG PAWHIN PATHIANAH INNGHAT RAWH

  _Ni 50 chhung Rinna_

By Rick Warren 

— Sep 19, 2023

“Engkim hi an hun theuhvah chuan mawi takin a siam a; mihring rilruah chuan chatuan a dah bawk a; mahse, chuti pawhin anni chuan Pathianin a tir ata a tawp thlenga thil a tih chu an hmuchhuak thei chuang lo.” Thuhriltu 3:11

Pathian a hmanhmawh vak loh laiin i lo hmanhmawh viau tawh thin em? Pathian hnen atangin engemaw beisei neia kan awm hian nghaktu nih hi a harsa kan ti thin khawp mai. Kan tawngtai chhanna chu Pathianin hna a thawk a nih ngawt loh chuan engthil pawh ti ila a lo thlen phah chuang lo.

Abrahama khan a hrethiam a ni. Pathianin thil theih nia lang lo a tiam a, Israel hnamte pa ni turin a hrilh a ni. Kum 75 lai mai ni tawhin fa pawh an la nei lo a, a mak reng a ni. 

Mahse Pathian hun ruat chu a fel famkim a ni tih a hriat a, Solomon-a chuan kum zabi tam tak liamtaah khan a lo ziak tawh a: “Engkim hi an hun theuhvah chuan mawi takin a siam a; mihring rilruah chuan chatuan a dah bawk a; mahse, chuti pawhin anni chuan Pathianin a tir ata a tawp thlenga thil a tih chu an hmuchhuak thei chuang lo.” Thuhriltu 3:11

Pathian hnathawh zawng zawng hi kan hrethiam vek thei lo, amaherawhchu a hun ruat erawh chu a sual ngai lo tih kan chiang a ni. Dik tak chuan rinna rahbi chhawng tam takah Pathianin a hruai thin che a. Abrahama ngei pawhin rinna chhawng ruk hi a paltlang a ni.

*Rinna chhawng ruk te chu*

*Hmachhawp:* Pathianin i chhungkua, kohhran leh khawtlang tan ruahmanna a siamsak che a. Pathianin Abrahama chu ram ropui tak a pe a: mahse chu chu a bul tanna chauh a la ni (Genesis 12:2-3).

*Thutlukna:* Pathianin ruahmanna a siamsak che chu puitlin turin rinna a penchhuak turin thutlukna i siam a ngai a ni. Abrahama chuan rinnain a in leh lo a chhuahsana ram a la hriat ngai loh leh a la hmuh ngai loh lamah chuan a chhuak a ni. 

*Khawtlaina:* Pathianin a ruahmanna chu vawilehkhatah a tihlawhtling nghal mai lo. Hetiang khawtlai hun hi, engmah thleng lo angin kan ngai hial thin. Bible chuann Abrahama kha Pathianin thu a tiam hnu kum 11 a liam hnuah pawh engmah a la thleng lo, Abrahama leh a nupui Sari khan fa an la nei chuang lo a ti (Genesis 16:1). Chu kum 11 chhung chuan eng nge lo thleng? Engmah. Abrahaman a nghak tawp a - Abrahama leh Sari chuan an nghak chhunzawm zel a ni. 

*Harsatna:* Pathian thil ruahman i umzuina kawngah chuan harsatna i paltlang ang. I thil beiseina pawh a chhia atangin a chhe leh zual dinhmunah a ding maithei. Abrahama, kum 99 mi tan chuan fa neih chu thil awihawm loh a ni tawh. Beiseina chu awmtawh lo ang pawhin lang se, Pathianin a tawpah chuan Abrahama leh Sari te chu fa a pe mai a ni.

*Thihna hnaihin:* Pathianin i beiseina chu thamraltir a phal niin a lang. Abrahama chu a fapa hlan turin a ti leh tlat mai. Pathianin a beiseina chu hlan turin a ti leh hmiah mai a ni.

*Chhanchhuahna:* Thihna kan hnaih poh leh chhanchhuahna lam hi a ropui thin. A tawpah chuan chu thil chu Pathian chauh lo chuan a ti thei lo vang tih i hrechhuak ang. 

Khing chhawng thumah khian khawiah nge i awm? Pathianin i rinna a tih puitlin zelna kawngah hian a hruai zel ang che.

Ngaihtuah zui atan

* Pathianin ruahmanna a siamsak che chu eng nge ni? Chu ruahmanna Pathianin a siamsak che chu engtin nge i hriat?

*Tuna i khualzin meknaah hian khawi laiah nge i awm? Khing chhawng ruk zingah khian eng khi nge a harsa lai ber?

* Pathian thil ruahman kan bawhzuina kawngah hian engvangin nge Pathianin a tihkhawtlai thin ni a i hriat? Engvangin nge a thil ruahman chu vawi lehkhatah a thlentir mai loh?

*[Lettu: Sangpuia]*