Naktuk-ah MNYF-in Mizo Nationalism Rally buatsaih dawn

Aizawl | September 18, 2023: Mizo National Youth Front Headquarters, Aizawl Vice President Zodinpuia chuan vawiin khan Aizawl Press Club-ah thuthar thehdarhtute kawmin, Two wheeler hmangin ‘Mizo Nationalism Rally’, September ni 19, 2023 (Thawhlehni) hian a buatsaih dawn a. He hunah hian Zoram zalenna tura nunna hlantu; kan hnam pasaltha ‘Martar’ ngaihlutu zawng zawngte leh Mizo hnam hmangaihtute lo tel vek turin MNF Thalai Headquarters chuan thinlung takin a a sawm a ni, a ti.

Zoram zalenna tura nunna hlantu, kan hnam pasalthate hriatreng na ‘Martar Day’ vawi 42-na September ni 20, 2023 a lo thleng tur pualin Mizo National Youth Front (MNYF) Headquarters’ chuan Two wheeler hmangin ‘Mizo Nationalism Rally’, September ni 19, 2023 (Thawhlehni) hian a buatsaih dawn a.

MNYF VP chuan, "Politics khawvelah pawh thalaite’n ram leh hnam tana nunna hlan huam a lo pen chhuak tawhte kan chawimawi a, kan ngaihhlut lehzual a ngai ta. Kan hnam pasaltha (Freedom fighter) ten ram leh hnam tana sulhnu min hnutchhiahte hi keinin kan chawisan loh chuan hnamdangin min chawisan sak ngai dawn lo tih hria in, Zoram zalenna tura penchhuak te i chawimawi thar zel ang u." tiin mipui a sam a ni.

Rally hi AMC Office bul, Thuampui veng atangin MNYF President Dr. L Thangmawia, MLA chuan a flag off ang a, hun kharna inkhawm hi chawhnu dar 2 ah Vanapa Hall-kawt a neih tur ni in, Pu Tawnluia, Deputy Chief Minister (Zoram in zalenna a sual lai a Army Chief) chuan hun a hmang bawk ang. Thangthar ten Mizoram Independence Movement kan hriat thar lehna a nih beisei in; hemi ni hian MNYF Headquarters chuan Mizoram in zalenna a sual lai a Mizo Hnam puanzar (Mizoram Flag) a pho lang dawn a ni.

Tin, hei bakah hian kumin 2023, September ni 28 hian Mizoram pum huap MNF thalai intawhkhawm, 'MNYF Workers Meet' Vanapa Hall, Aizawl ah neih a ni dawn bawk.