Aizawl | September 18, 2023: Siaha District Jail atanga a tlan chhuah hnua, Central Jail Aizawl-a a ṭhianpa tlawh tum man a nih leh hnua Police kut atanga tlanchhuak leh a Kanan Veng, Aizawla In pakhat rawk leh tu nia hriat Vanrampana, Meisatla, Siaha chu vawiin chawhma lam khan man leh a ni.
Zabilianz in a tarlan danin, Nimin September ni 17 chawhma inkhawm hlan khan Kanan Venga in pakhat chu rawk niin, Scooty leh mobile phone ruk chhuah a ni a. Rukru hi rukruk thubuai avanga Siaha District Jail-a tang, tun thla ni 9-a tlan chhuak, tun thla vek ni 15-a man a nih leh hnua Police kut atanga tlan chhuak leh ta Vanrampana ni ngeia hriat a ni.
Kanan veng leh a chheh vel branch hrang hranga YMA member te leh Police ten zawng zui nghalin, kum 24 mi Vanrampana chu vawiin chawhma lam khan Rangvamual-ah an man leh ta niin Police hotute chuan an sawi. Nimina Kanan veng, Aizawla in rawktu pawh amah ngei a lo ni tih thudawnna chuan a sawi bawk.
Tarlan tawh angin Vanrampana hi rukrua puh a nih avanga man, a chungchang thu ngaihtuahlai niin, Sept 9 khan a tan na Siaha District Jail atangin a tlanchhuak a. Tun thla ni 15 chawhnu lam khan Central Jail-a tang a thianpa tlawh a tumna lamah man leh niin, hemi ni vek hian Zonuam Police Out-post a duty ten Siaha Police hnena hlan tura an buaipui laiin a tlan chhuak leh a. Nimin khan Kanan veng, Aizawlah mi in rawk lehin Scooty leh mobile phone a ru chhuak a, a thil ruk te hi nimin vek khan hmuhlet leh niin, hemi hnu hian Scooty dang ru leh a, chumi an chhuizuina lamah chuan vawiin chawhma lam khan an man ta niin Police hotute chuan an sawi a ni.
- Zabillianz
.
Post a Comment
He post chungchanga i ngaihdan lo sawi ve rawh: