HRINGNUN HI HMANGAIH ZIRNA A NI

  Ni 40 chhung Hmangaihna

By Rick Warren 

— Sep 26, 2023

“Ani chuan a hnenah, ‘Lalpa, i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tur a ni,’ tih hi. Chu chu thu pek ropui leh pawimawh ber a ni. Tin, a dawttu, a anpui chu hei hi a ni, ‘Nangmah i inhmangaih angin i vengte pawh i hmangaih tur a ni,’ tih hi.” Matthaia 22:37-39.

I nun chu chhiar tlak a nih theihna turin, i rilru i pek a ngai a ni. Thil zawng zawng ti turin hun i nei lo, thil zawng zawng hi a hlutna a inang vek kher lo. 

A nih chuan i rilru i sawr bingna tur chu eng nge? Lal Isuan eng nge pawimawh chu a rawn sawi chiang hle a. “Ani chuan a hnenah, ‘Lalpa, i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tur a ni,’ tih hi. Chu chu thu pek ropui leh pawimawh ber a ni. Tin, a dawttu, a anpui chu hei hi a ni, ‘Nangmah i inhmangaih angin i vengte pawh i hmangaih tur a ni,’ tih hi.” Matthaia 22:37-39.

Lal Isuan hringnunah thil dang zawng zawng aia pawimawh a sawi a. “A hmasa ber leh a ropui ber” chu Pathian hmangaih hi a ni. “A dawttu” atan chuan vengte hmangaih hi a ni. Khing pahnihte khi i neih tawh chuan, hringnun i man thiam tihna a ni ang.

Eng vangin nge Pathianin a siam tirh che khan vanah a hruai mai loh che tih i ngaihtuah ngai em? Eng vangin nge Leiah hian a dah tlat che? A rei berah kum 100 emaw i dam ang a, tichuan chatuana i awmna tur vanramah emaw hremhmunah emaw i kal dawn a ni. Eng vangin nge Pathianin mi zawng zawng hi vanramah a hruai vek mai loh le?

Hringnun chu thil neih rei rui - engzat nge i neih tih lam a ni lo va. Hringnun chu thil tih vak - engtia nasa nge i thawh tih lam pawh a ni lo. Hlawhtlinna lam - engzat nge i hlawh tih pawh a ni chuang lo va. Khawvelin a hrilh zawng zawng che hi a ni lo. I eizawnna te hi vanah i kaipui dawn lo. I in emaw i car emaw vanram i kaipui dawn lo. Nimahsela i nungchang i kaipui dawn. Nangmah nih tirtu che a nih avangin.

Pathian chuan kum 80 atanga kum 100 chhung he Leiah hmangaih zir turin a dah che a. Chu chu hringnun chu a ni - thinlung zawng zawnga Pathian hmangaih zir leh mi dangte hmangaih zir hi a ni.

Hringnun hi thil lian tham tak hmangaih zirna a ni.

Ngaihtuah zui atan

* Mi chungah hmangaihna i lantir theihna turin i thil tih eng nge bansan ngai le?

*Engti kawngin nge Leiah hian i hun tam mzawk i hman?

* Hmangaih zir hi Pathianin zirlai pawimawh ber a tihna chhan hi engvang nge nia i hriat?

[Lettu: Sangpuia]