HLAUHNA NI LO, RINNA ZAWK I THINLUNGAH RORELTIR RAWH

 _Ni 50 chhung Rinna_

By Rick Warren 

— Sept 12, 2023

“Mi tam takin ngawi turin an hau va; nimahsela ani chuan, "Davida Fapa, mi khawngaih rawh," tiin a au zual sauh va.’” Marka 10:48

I nunah rinna chungchanga bul ṭan thar tur i nih chuan, hlauhna i hmachhawn a ngai ang. Inthununtir suh! Hlauhna chuan kan theihna te a ti zeng ṭhin a — kan nunah rinna nei tura penchhuah pawh min dal ṭhin.

Rinna aiin hlauhna kan thlan zawk chuan, rinhlelhna min neihtir a - thil thar tih kan ngam lo ṭhin a ni. Mahni hma min sialtir a — Pathian leh mi dang hnenah inpek kan hlau ṭhin. Thil thui tak min thlirtir thei lo va — hmalam hun thlir lo vin hnung lam chauh min ngaihtuahtir ṭhin.

Bartimaia pawh hian keimahni ang bawkin hlauhna a hmachhawn a: chu chu hnawl nih hlauhna a ni. Mitdel a ni a, dam a duh a ni. Mipui zinga Isua koh chu thil dik ber niin a hre lo va. Mipuiin an hmuhhniam phah ang tih a hlau a. Hrehawm ti takin a awm a. Chuvangin Krista chu amah ṭanpui theitu awm chhun niin a hria a ni.

Isuan a kohna chu a ngaithla a. Bible chuan, “Mi tam takin ngawi turin an hau va; nimahsela ani chuan, "Davida Fapa, mi khawngaih rawh," tiin a au zual sauh va.” (Marka 10:48).

Eng nge lo thleng en teh ang: Isua a koh lai chuan, a kianga awm te chuan, “Ko ko suh. Ngawi la. Lo inlar suh. Isuan a ngaithla duh lo vang che. Thil pawimawh dang tih tur a ngah zawk,” tiin an hrilh.

Chutiang chiah chuan sual chuan min tibuai ṭhin a. Rinna hmang chhuak tura remchanna kan hmuh lai pawhin, kan rilru leh ngaihtuahnaah chuan, “Pathianin min ngaithla duh lo vang” emaw “Lo inlar suh” emaw “Miten engtin nge min ngaih ang?” tihte chuan rinna kawngah min dal ṭhin. Tihdanglamna hun ṭha i neih chuan, kil hrang hrang aṭangin aw chuan hei hi i tih tur a ni lo min ti ṭhin.

Mahse Pathian chuan tun hma zawng aia thil ropui zawk ti turin a beisei che a: Amaha innghat pumhlum turin a duh che a. A hlauhthawnawm deuhin i hria em ni? A dik alawm dik chu.

Pathianin thil ti tura a ngen che chuan, duhthlan tur i nei a ni. Hlauhna vang chuan i hnungtawlh dawn nge tuna i awmdan ang khan i la awm dawn? Nge rinna neiin hmalam panin i penchhuak zawk dawn?

Ngaihtuah zui atan

* Tu hnawlna nge i hlauh ber?

* A chang chuan rinna aiin hlauhna hi thlan mai a awl dawn ṭhin a, eng nge a chhan nia i hriat?

* Thufingte 29:25 chuan, “Mi dang ngaih dan pawisak luat a hlauhawm a, Lalpaa innghah erawh chu a him.” Mi dang ngaihdan ai chuan Pathian ṭanpuina dil zawk ang che.

*[Lettu: Sangpuia]*