Haflong-ah Zofest 2014 Lung phun hawn a ni

- "Mizoram pawna awmte hian, Zofest thlen hi i inchuh zawk ang u," - Haflong Zofate

- "MZP in rinawmna chibai kan sem zel dawn," - MZP Adviser

Aizawl | September 9, 2023: Haflong Area Zohnahthlak Apex Body(s) te leh MZP Gen Hqrs te huaihawtin nimin September ni 8, 2023 (Zirtawpni) khan Zofest ṭum 6-na, Dec ni 3-5, 2014 a neih lung phun hawnna neih a ni a, MZP Adviser in a hawng.

Kum 2014 a MZP- in Zofate inunauna atana hma a lakna, Zofest Lung phun hawnna neih paha CH Khawthlang Hall, Muolhoi, Haflong a inkhawm neihah, Haflong a pawl hrang hrang hruaitu chin mi eng emaw zat an kal khawm a ni.

Zofest Lung phun hawngtu MZP Adviser Pu Lalnunṭawma Fanai chuan, " MZP chuan hruaitu hmasate aṭangin, hun harsaah pawh ni se, kil tina kan unaute kiangah "Rinawmna Chibai," an lo sem tawh ṭhin a, rah duhawm tak kan hmuh mek avângin, he rinawmna chibai danglam bik hi kan sem zel dawn a ni," a ti a. Tuna Manipur buainaah hian, Mizoram sorkar hotu Chief Minister leh a thawhpui te, Political Party te, Kohhran hruaitute leh NGO hruaitute hmalakna leh mipuite inhawnna chu state danga Zofate chuan an hriatsak ve a ṭul niin a sawi bawk.

Lung phun hawn inkhawmah hian Haflong a Zofa hnam hrang hrang aiawh Kuki Inpi, Biate Devanpui, Vaiphei Peoples Council leh Hmar Inpui hruaitute pawhin thu sawiin, Zohnahthlak chibing hrang hrang zingah, 'Mizo kan ni' inti duh chiah lo kan awm lai a, kan ṭobul Chhinlung chhuak kan nihna inhrilhhriatna nei a, MZP ten heti taka hnam inpumkhatna an buaipui chu fakawm hlea an hriat thu leh MZP policy chu pawm tlan ngei a ngaih thu an sawi hlawm a, "Zofest thlenna tur hi hnawng fo loin, Mizoram pawna awmte hian, Zofest thlen hi i inchuh zawk ang u," tiin an sawi hlawm a ni.

Nimina Zofest lung phun hawnna hi Upa Macbeth Buongpui, Finance Secy Muolhoi Village Council in a kaihruai a, Haflong a Zofate pawl hrang hrang hruaitu chin eng emaw zat an kal khawm a. Zaithiamte pawhin thiam takin mipui an awi a ni. MZP aṭangin Zofest neih ṭuma hruaitu Pu R. Lalrokima leh Pu Michael Lalramsanga te an kal bawk a ni.

ZOFEST lungphunah hian, hemi ṭuma MZP hruaitute hming ziah a ni a, chungte chu :

President : Lalhmachhuana

Vice President : Lalsangzuala Ngente

General Secretary : L. Ramdinliana Renthlei

Asst General Secretary : Joseph K. Zohmingliana

Treasurer : R. Lalrokima

Fin Secretary : Michael Lalramsanga te an ni.

MZP chuan Zofate inunauna inkhawmpui lian ber Zofest an lo neih tawhna hmunah lung an phun vek tawh a, Zofest neihna hmasa ber Manipur (Lamka) ah chiah lung phun hi an la hawng lo a ni.