Aizawl-ah Zirlaite'n faina kawng zawh

Aizawl | September 29, 2023: Tukin khan Aizawl khawpui hmun hnih Chanmari leh Kulikawn ațangin zirlaiten faina kawng zawh an nei a, Vanapa hall kawtah kharna hun hman a ni a, School Education Secretary Dr Lalzirmawia Chhangte-in kharna hun a hmanpui.

Kharna hunah hian Dr Lalzirmawia Chhangte chuan thusawiin faina puala hun hman hi sorkarin a ngai pawimawh a, Aizawl chauh ni lovin Dist hrang hrangah hman a ni a ti a. Thianghlimna leh faina hnathawh hi kan uar dawn a, thupui chu garbage free India tih a ni tih sawiin India ram hi fainaah duh thu a sam lova, schoolah faina ru sum a thlak a, mite thinlungah fai duhna a lo awm ta a, tunah chuan kan ziaawm ta hle a ni a ti. Secretary chuan faina kawngah hian tha thlah lova țan mar pat a ngai a, Khawpui bawlhhlawh leh țawp te tihfai anih loh chuan natna hrang hrang leh tlang hrileng vei a awlsam a, kan hrisel nan fai a pawimawh a ni a ti. Secretary chuan awmna hmun apianga faina kawnga mite tihhmuhtu ni turin zirlaite a chah a. Faina leh thianghlimna hi ni bik hman a thawh mai a tawk lo tih sawiin sikulah leh vengah chhunzawm zel turin zirlaite a chah.

Secretary chuan Kan leilung kan ram hi humhalh tur a ni a, a riral zel loh nan leh a bawlhhlawh loh nan humhalh a pawimawh tih sawiin kan hlut thiam a ngai a, lei timin leh tichhe thei laka humhim a ngai hle a ni a ti.

Secretary chuan 2047 ah India hian ram intodelh nih kan tum a, intodelh turin theihtawpin kan bei dawn a, kan hnam rohlu te humhalh a ngai a, kan pasaltha te kan ram tana nunna hlantute pawh zah an phu a, keimahni ngei pawh khua leh tui țha ni tura kan intiam thar zel a ngai a, chu chu ram tan a pawimawh a ni tih sawiin ram tana rohlu ni turin zirlai te a chah bawk.

Zirlai kalkhawm te hian Pu P.C. Lalngaizuala Dy Director kaihhruaiin faina thu an tiam a, Pu Zoliani Dy Direcror-in lawmthu a sawi bawk. Faina kawng zawhah hian Aizawl khawpui chhunga High school leh Higher secondary Sikul 15-a zirlai leh zirtirtute an tel a ni.