Vairengte - Rengtekawn inkara 4-Lane kawng laih hun a leivung paihna tur chungchang sawiho

Kolasib | August 1, 2023: Vawiin khan DC Conference Hall, Kolasibah Vairengte leh Rengtekawn inkar, Package 3 leh 4 chhung a 4-Lane kawng laih hun a leivung paihna tur, Muck Disposal site atan a hmun ruahman te sawi hona hun neih a ni a. Deputy Commissioner John LT Sanga'n thutkhawm hi kaihruaiin Competent Authority for Land Acquisition, DFO, NHIDCL, Vairengte, Bilkhawthlir leh N.Chhimluang Village Council leh YMA hruaitute he hunah hian an tel a ni.

Thutkhawmnaah hian leilung hausakna humhalh chunga hmasawnna hna kalpui a pawimawh thu leh inbuktawk tak a kalpui a nih loh chuan harsatna lian zawk thlentu a nih theih thu sawi niin Kolasib paltlang tur a 4-Lane kawng laih tur pawh hna a tak a kalpui hmain ruahmanna felfai tak siam hmasak a pawimawh thu sawi a ni. Package 3 chhungah leivung paihna hmun 8 leh Package 4 chhungah hmun 7 ruahman sa te chu sawi ho niin hna hi Engineering, Procurement and Construction (EPC) zawm chung a kalpui tur a nih angin leilung tichhe tam lo zawng a khawtlang duh dan leh a tul dan a zirin hnathawh hunah leivung paihna hmun pawh tih danglam theih tur a rel a ni. Leivung paihna hmun tur hian NHIDCL-in ram a lak tawh pawn lam ami hman a nih chuan zangnadawmna hranpa ruahman a nih loh tur thu tarlan niin ram hawh man erawh Contractor-te nen inbiakremna ang a pek tur a nih thu sawi a ni a. Chhut danin leivung zaa 50 chu kawng laih thar huam chhung hmun hrang hrang hnawh khah nan hman a nih tur thu leh zaa 50 dang chu leivung paihna hmun ah paih tur a nih thu NHIDCL lam chuan tarlangin khawtlangin leivung hman tangkaina tur an neih chuan a remchan dan a zirin ruahmanna siam sak theih a nih bawk tur thu sawi a ni.

Kolasib district chu Mizoram luhkapui a nih angin kawng hrang hranga hmasawnna thleng tur chuan inkalpawhna tha leh changtlung a awm a pawimawh thu Pu John LT Sanga chuan sawiin 4-Lane kawng tha tak a awm theih nan ruahmanna siam kawngah te, a vil kawngah te, tul lova ram leilung tih chereuna thleng lo tur a neitu nihna thinlung nen a ven kawngah te Sawrkar, khawtlang leh hnathawktu turte tanrual a pawimawh thu a sawi.