Transport Deptt-in Ropeway siam tumin hma a la; MST Bus service lai 26 a awm mek, Lirthei sing nga chuang black list!

Aizawl | August 24, 2023: Transport Minister TJ Lalnuntluanga chuan, vawiin chhun dar 12:30 khan Aizawl Press Club-ah thuthar thehdarhtute kawmin Kum 2018 leh 2023 inkara Transport Department hmalakna hrang hrang a sawi a, Transport Deptt-in Ropeway siam tumin hma a lak thu sawiin, MST Bus service lai 26 a awm mek, a ti bawk.

Minister chuan, Mizoram sawrkarin Ropeway chu Jan 19, 2019 khan Transport department kutah a pek thu sawiin, Transport Deptt chuan mipui chetvelna awlsam zawkna atan Ropeway siam tumin kawng hrang hrangin ngaihtuahna a sen thu a sawi.

Aizawl khawpui-ah Ropeway siam tuma hmalak niin, tunah hian project khawitu Mott Mc Donal te feasibility report ngaihchan mek a ni, a ti.

Minister chuan, Silchara Transport deptt hmun, kum 1993-a Pu Zangena hnen atanga lei hun rei tak deptt hminga awm lo chu kum 20221 khan tihfel a nih thu a sawi bawk.

Minister-in a tarlan dani, December 31, 2019-a lirthei registration nung tawh lo 45,646 te chu January 21, 2020 khan a neitute hnenah registration renew turin hriattirna pek an ni a, November 20, 2020 khan December 15, 2020 ral hma ngeia renew tura hriattirna pek nawn leh an ni a, hun pek chhunga registration renew lo lirthei 43,137 te chu February 18, 2022 khan Blacklist a ni.

January 1, 2020 to December 31, 2021 chhunga lirthei registration thi 8,708 te chu Abril 7, 2022 khan an registration tifel tura hriattir an ni leh a, heng zinga registration renew lo te chu Blacklist leh an ni a, hemi tum hian mimal lirthei 8,365 leh sawrkar lirthei 130 te chu blacklist leh an ni.

heti hian February 18, 2022 a lirthei black list 43,137 leh 2022 veka mimal lirthei 8,365 leh sawrkar lirthei 130 te nen a vaiin listhei blacklist zawng zawng hi 51,632 a ni.

TJ Lalnuntluanga chuan, Tlabung, Vairengte, Serchhip-ah te Commercial Vehicle Terminal cheng nuai 270, nuai 180 leh nuai 240 senga sakte chu December 9, 2022, April 12 leh 13, 2023 ah te hawn a nih thu a sawi.

Minister chuan, MST Bus service lai 26 a awm mek thu sawiin, Aizawl - Lunglei, Rajiv nagar, Marpara, KHuangthing, Saipum or North Hlimen, Mimbung bakah Phuldungsei (tripura) inkar te a tlan mek thu a sawi bawk.

November 12, 2022 khan STA meeting chuan Aizawl tih loh district headquarter dang zawng leh Thenzawl-ah te Two Wheeler taxi Service theih nan ruahmanna a siam a. Heng bakah hian sawrkar chuan ZMC , MZU leh Lengpui Airport-ah te public transport a lo ruahman tawh bawk a ni.