Saitual-ah Y20 Meet on Patriotism, Nationalism & Development hmang; Mi fak phut lo leh mi hmuh atan ni lova, kan ram leh hnam tana kan tih theih tawk thil ṭha kan tih suau suau chuan hma kan sawn ang

Aizawl | August 3, 2023: Mizo Zirlai Pawl leh Mizoram Sports & Youth Services Department ṭangkawpin an buatsaih Y20 Meet on Patriotism, Nationalism & Development chu vawiin chawhnu khan Govt Saitual College Auditorium, Saitual-ah hman a ni a, Lengteng Bialtu MLA leh Human Resource Development Vice chairman ni bawk Dr L Thangmawia chuan khuallian niin a hmanpui.

He hun hi Govt Saitual College Principal Lalzarmawia chuan a kaihruai a ni.

Khuallian Lengteng Bialtu MLA leh Human Resource Development Vice chairman ni bawk Dr L Thangmawia chuan thu sawiin, "Zohnahthlakte hi harsatnain min hnukkhawm ṭhin," a ti a, "tunah chuan tunhmaa Lusei ṭawng hmang lo Mizo lo riaua hmuh ṭhinna tam tak a bo tawh," tiin, "tuna harsatna zawng zawng hi kan hnam indinchhoh hunah thawnthu ngaihnawm a la chang dawn a ni," a ti bawk.

L Thangmawia chuan, "langsar lo rawngbawlnaah hian kan kal nat phawt chuan hma kan sawn ang," a ti a, "hei hi kan intlansiakna tur a ni." a ti bawk. "Mi fak phut lo leh mi hmuh atan ni lova, kan ram leh hnam tana kan tih theih tawk thil ṭha kan tih suau suau chuan hma kan sawn ang," a ti bawk.

MZP General Headquarters, Aizawl Adviser Lalhruaitluanga Chawngte chuan thupui a sawi a, "Zofate hi ram rorelna hrang hrang hnuaiah ṭhendarh kan nih thu sawiin, ramin ri a nei a nih pawhin a tawpkhawkah chuan thisen hi a tak zawk," a ti a. Hnam inpumkhat nana hnam ṭawng a pawimawh zia leh ṭawng ral a pawi ziate a sawi a, hnamin hma a sawn nan thiamna a mamawh thu a sawi bawk.

He hunah hian Govt Saitual College zirlai leh zirtirtute an tel a, Zorun Cultural Club (Govt Saitual College) te'n hnam lam mawi tak an entir a ni.

Y20 Meet on Patriotism, Nationalism & Development hi Y20 Secretariat, Ministry of Youth Affairs and Sports (GOI) hnuaia buatsaih a ni.