Minister Lalchhandama Ralte-in ZOFEST lungphun hawng

Aizawl | August 28, 2023: Mizo Zirlai Pawl (MZP) General Headquarters, Aizawl buatsasihin vawiin August 28, 2023 chawhma dar 11:00 khan Aizawl-a ZO FEST lo hman tawhna hriatrengna lungphun hawnna hun hman a ni a, Minister Pu Lalchhandama Ralte, (MZP Ex - President) chuan khuallian niin a hawng.

ZO FEST Lungphun hawnna inkhawm MZP Conference Hall, Aizawl-a neih hi MZP Executive Committee member Michael Lalramanga'n a kaihruai a. He hunah hian Aizawl-a tum thum, Kum 2004, 2006, leh 2009 a ZOFST lo hman tawhna te hriatengna lungphun pathum hawn a ni.

He huna thusawitu Minister Pu Lalchhandama Ralte chuan, "ZO FEST hi Zo hnahthlak inpumkhatna Kut atana buatsaih a ni," a ti a. "MZP in hetiang kut ropui leh hnam atana hlu a lo buatsaih hi a hlu takzet," a ti a. MZP President a nih laia buatsaih tan a nih vanga Aizawl-a ZO FEST tum thum; kum 2004, 2006 leh 2009 a hman tawhna hriatrengna lungphun hawngtu atana sawm a nih chu lawmawm a tih thu a sawi a. Zohnahthlak inpumkhatna a ngaihpawimawh thu sawiin, MZP ngenna angin, an chenna buai avanga Mizoram rawn bel zirlaiten kum hloh lova zirna an chhunzawm zel theih nan sawrkarin theih tawp a chhuah thu a sawi bawk.

MZP President Pu Lalnummawia Pautu chuan, "Hnam tana MZP hmalaknaah kan tel ve thei hi a lawmawm," tiin, Hnam inpumkhatna atana MZP hmalakna hian a hunlaiin sawisel leh dodalna tawk thin mahse, rah tha tak a chhuah zel a ni," a ti bawk.

He hunah hian MZP General Headquarters, Aizawl-a Office Bearers lo ni tawh te'n thu an sawi a, MZP General Headquarters, Aizawl Executive Committee Member leh Hnam pual zirlai pawl hruaitute an kalkhawm a ni.