Aizawl | August 5, 2023: Manipur-a buaina thleng mekah Indigenous Tribal leaders’ Forum (ITLF) in hnam tana martarte vuina hun, Haolai Khopi S.Bualjang/Torbung hmuna buatsaih a tum chu Chief Minister Pu Zoramthanga ngenna avangin thulh rih a nih thu MNF Media & Publicity Department in vawiin-a thuthar thehdarhtute an kawmna ah an sawi.
MNF Media hruaitu te sawi danin, ITLF thiltum avang hian Manipur-ah boruak a tang ru hle a, hei vang hian Ministry of Home Affairs chuan boruak tha lo zawk a thleng thei tih hriaiin lamkal a tir a. Martarte vuina hun hman tum chungchangah Central Sorkar aiawh leh ITLF aiawhte’n August ni 2 khan tum hnih meeting neiin, Central Sorkar aiawhte hian mithi vui hun sawn turin ngen mahse an ngenna hi tihhlawhtlin sak an ni lo a, Union Minister Amit Shah chuan Assam Chief Minister Himanta Biswa Sarma tir ve lehin Assam Chief Minister hian Mizoram Chief Minister Pu Zoramthanga chu telephone a biain, ITLF hruaitute hnenah mitthi vui hun sawn tura ngenna thlen turin a ngen a. Pu Zoramthanga chuan CYMA President Pu R.Lalngheta chu ITLF hruaitute dawr dan tur chungchanga ruahmanna a siampui hnuah Manipur Zofa Hman hruaitute chu telephone hmanga biain Central lam ngenna hi ngaihthlaksak phawt turin rawtna a thlen a. Chief Minister chuan Central sorkar chu Manipur buaina chungchanga thu thlente ngaihtuah saktu tur leh harsatna sutkian an beisei mekte ngaihtuah saktu tur an nih avangin an duh ang tihsak phawt a him rih a rin thu Manipur Zofa hruaitute hi a hrilh a ni.
He thu hi August ni 3 zing dar 3:00 thleng Manipur Zofa hruaitu te'n an sawiho hnuah, “Pu Zoramthanga, Zofate tana ding ngam leh duhsak em em tu, 'Pa' ber dinhmuna an neih ngenna chu a zahawm e," tiin mitthite vui hun chu sawn an remti ta a ni. Mitthi vui hun sawn hi remti mahse Peace Ground, Lamka-ah hnam tana Martar-te pualin hun an buatsaih tho a ni.
Hetihlai hian ITLF chuan Union Home Minister hnenah Lamka-a Assam Rifles Hqrs. 27 Sector kaltlangin an thil phut point panga te nen ni nga (5) chhung nghah leh phawt an remtih thu lehkha an thawn zui bawk.
MNF Media Dept sawi danin, Buaina nasa zawk thleng thei reng leh nunna tam tak chan belh theihna boruak karah Chief Minister Pu Zoramthanga ngenna anga ITLF te'n Central lam ngenna an remtih tak avang hian Union Home Ministrypawh an lawm hle a. He thu hi Assam Chief Minister Himanta Biswa Sarma pawhin a hriat veleh, August ni 3, zing dar 8:30 khan Pu Zoramthanga chu telephone-a rawn biain lawmthu a hrilh leh bawk a ni.
Hetih lai hian Mizoram sorkar in Manipur unau raltlante a buaipui zui zel a. Nimin tlai lam dar 5 thleng khan Mizoramah Manipur kan unau raltlan hi 12,632 an awm mek a, District hrang hrang 11-ah an awm mek a ni.
An mahni chhawmdawl kawngah YMA, VC/LC, khawtlang, pawl leh mimal hrang hrangin theih tawp an chhuah mek zel a. Mizoram sorkar pawhin a theih tawp a chhuah zel a, Manipur raltlan leh Manipur Zofate pualin May ni 8 atanga nimin thleng khan buhfai quital 4983 sem chhuah a ni tawh a ni.
An hun tawn avanga rilru lama harsatna tawk awm theih a nih avangin raltlan camp hrang hrangah sorkar-in Covid 19 do nana a din Psychological and Social Guidance team chuan hma lain v camp hrang hrang kalin an rilru lam hriselna tur atan hmalak a ni bawk a ni.
- AIR
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: