Kolasib tan Autorickshaw permit 112 pekchhuah vanga lawngawi lovin KARDU-in DTO leh a staff te pisa kal tur dang

Aizawl | August 24, 2023: State Transport Authority-in Kolasib tan Auto Rickshaw permit leh Two Wheeler Taxi permit a pek chhuah thar leh avanga lungawi lovin Kolasib Auto Rickshaw Drivers' Union (KARDU) chuan District Transport Office thawktute chu an office kawtah hnathawk thei lovin an dang a, an harsatna hi Kolasib bialtu MLA K Lalrinliana, minister hnenah thlen tawh mahse STA hmalakna chu a hriatpui ve loh thu a lo hrilh.

Kolasib-ah hian Auto Rickshaw 388 a awm a, permit pek thar leh hi 112 niin Two Wheeler Taxi permit 93 leh Taxi permit 43 pek a ni bawk a, permit hmu thar zingah sorkar hnathawk te, JCB nei te, permit pak hmasaka hmu tawh te awmin permit hralh tum, an hriatchian tawh pawh an awm niin an sawi.

Kolasib Autorickshaw Drivers' Union (KARDU) member te chuan tunhnaia sorkarin Kolasib khaw chhung bik atana Autorickshaw permit 112 zet a pek chhuah chu eizawnna atana Autorickshaw hmang mektute tan in 'tam-chhuah' theihna tur khawpa tam ni a an hriat avang leh Permit pek chhuah tharte hi cancel tura Transport Minister hnena an thu thlenah chhanna an hmuh loh avangin lungawilohna lantir nan vawiin chawhma atang khan tiam chin awm lovin Kolasib DTO leh a staff te pisa kal tur an dang.

KARDU member te hi Kolasib DTO pisa tual ah pungkhawm in, lungawilohna an neih te an puang a, he huna thusawitu KARDU President Pu Ramfangzauva Ralte chuan, Transport department hnuaia State Transport Authority (STA) in tun thla August ni 1 a eizawnna atana hman chi lirthei (commercial vehicle), Kolasib District leh Kolasib khaw chhung bik atana Permit a pek hrim hrim hi an dodal loh thu leh hetiang hi kum dangah pawh pek a nih thin thu leh an dodal ngai loh thu a sawi a. Tun tuma Permit an pek chhuah erawh hi chu a tam in, Stand pawh in chan ngaihna a awm loh a ti.

KARDU President chuan, Autorickshaw Permit hi eizawnna atana hmang tur dik tak ten hmu se an duhsak thu sawiin, tun tuma Permit hmu tura hming lang zingah hian Ruling Party Block hruaitu nilai te, sorkar hnathawk mek te, Permit nei mek leh Permit pahnih (2) nei mek te, Chhungkaw khat atanga permit pahnih (2) hmu thar te, Pafa a hmu te leh chhungkaw khata cheng unau a hmu te an awm thu sawi in, JCB pahnih lai nei thei khawpa khawsa thei te pawhin Autorickshaw Permit an hmuh thu a sawi.

KARDU President chuan, Permit hmutu tam takin eizawn nana Autorickshaw an hman laiin, Permit hmutu mi engemawzat chuan sumdawn nan an Permit chu hmangin, cheng tam tak takin an hralh leh thin ni a an hriat thu a sawi a, Kolasib khawchhung bik atana Autorickshaw Permit 112 a pek thar hi sorkarin a cancel hma chuan DTO pisa kal tur hi tiam chin awm lovin an dan (picketting) zel tur thu a puang ani.

Tun thla August ni 1 khan sorkar chuan Kolasib khaw chhung bik tan Autorickshaw Permit 112; Two Wheeler Taxi Permit 93 leh Taxi Permit 38 a pe chhuak a, hei bakah hian Kolasib District chhunga khaw dang tan Taxi Permit 3 leh Autorickshaw Permit 96 a pechhuak bawk.

Autorickshaw Permit 112 zet pek chhuah chungchangah hian KARDU hruaitute chuan tun thla ni 14 khan Kolasib bialtu MLA Pu K. Lalrinliana, minister an hmu a, minister hian engmah hriat a neih loh thu sawiin, Transport Minister hmu tura alo rawn angin KARDU hruaitute chuan ni 21.8.2023 (monday) khan Transport Minister an hmu a.

Transport minister hnenah hian ni thum chhunga Autorickshaw Permit 112 hi cancel turin ngen a, an ngenna in awmzia a neih loh avangin hmalakna hmasa atan Kolasib DTO leh a staff te pisa kal tur hi an dang ta ani.

KARDU chuan sorkar in Kolasib District tana Commercial Vehicle Permit a pekchhuahna order (copy) hi an hal ani.

Kan corr sawi danin, tun dinhmunah Kolasib khaw chhung bikah hian KARDU member 286 vel an awm mek a, Auto stand 12 a awm a ni.

- AIR & Kolasib Aw