Kolasib-ah Y20 Meet on Patriotism, Nationalism & Development hmang; Minister K Lalrinliana'n hmanpui

Kolasib | August 5, 2023: Mizo Zirlai Pawl leh Mizoram Sports & Youth Services department buatsaih Y20 Meet on Patriotism, Nationalism & Development chu nimin chawhnu dar 1 khan Govt Kolasib College Main Hall-ah hman a ni a, Minister K Lalrinliana chuan khuallian niin a hmanpui.

Y20 Meet on Patriotism, Nationalism & Development hi Govt Kolasib College Principal T Zahmingliana'n a kaihruai a, MZP General Headquarters, Aizawl President Lalnunmawia Pautu chuan keynote address a nei.

Minister Pu K.Lalrinliana chuan hmasawnna hna thawk ho tur a ram hrang hrang 20 intelkhawm, G20 chuan ram tih hmasawnna tur chuan mahni hnam a chianna, hnam hmangaihna leh hnam tan a inpekna thinlung ṭhalai te ah ngaih hlut tharna siam a ngaih pawimawh thu a sawi a. Ram ṭha tak a humhalh tur chuan hnam ziarang chawisan te, hnam thuam leh lam vawn nun leh mahni hnam zahpui loh a pawimawh thu a sawi. Minister chuan hnam humhalh nan kawppui zawn kawngah fimkhur a ṭul thu sawiin Mizo mipate chu pasal tlak ni tur a nun uluk tur te, innghahnatlak ni tur a eizawnna kawng a taimak chhuah te leh hnamdang te tan pawh a entawntlak ni tur a invawng thianghlim kawngahte ṭan la turin a fuih. Harsatna leh buaina avangin hmun hrang hranga zohnahthlak te karah inpumkhat duhna rilru a darh mek thu Pu K.Lalrinliana chuan sawiin hnam ropui ni tur chuan zohnahthlak zingah hnam anga inunaunna ṭha leh inlungrualna a awm a pawimawh thu a sawi. Ram leh hnam tan kawng engemaw tal a ṭangkaina neih tum turin Minister chuan zirlai kalkhawmte chu a chah a, intodelhna tur a theihna leh thiamna hmantlak zir chhuah tum tlat turin a fuih bawk a ni.

Hun kaihruaitu Pu T.Zahmingliana, Principal chuan Youth Meet 20 thupui atan a 'Nationalism, Patriotism & Development' hman a nih chhan sawiin mahni ram leh hnam hlut leh chawisan nachang thalai zingah hriat thar a pawimawh thu a sawi a. Hmasawnna famkim thleng tur chuan ram leh hnam hmangaihna leh ngaih hlutna a awm tel a ṭul thu a sawi bawk a ni.

Pu Lalnunmawia Pautu, President, MZP General Headquarters chuan ram leh hnam boral lo tur a humhalh tur chuan mahni hnam ah chian hmasak a ṭul thu sawiin hnam ziarang leh thuam te zahpui lovin chawisan kawngah zirlaite an pawimawh thu a sawi a. Khawvel thiamna leh changkanna chu chhiatpuitu ni lovin zirna kawng a hmasawn pui nan a hmang ṭangkaitu ni turin zirlaite a chah bawk a ni.

Pu L.Ramdinliana Renthlei, Adviser, MZP General Headquarters chuan thupui sawi hawnna neiin ram leh hnam hmangaihna leh ram leh hnam tan a inhuamna tuh nun thar lehna turin Youth 20 Meet thupui atan 'Nationalism, Patriotism & Developmental' thlan a nih thu a sawi a. Harsatna, buaina leh ṭamna nasa tak avanga dinhmun ṭha leh nuam zawk sual chhuah duhna chuan hnam hmangaihna a pian chhuah tir thu a tarlang a, hnam ang a kan dinchhuah lehna tur a nunna hlu tak channa te, thisen luang ral tam tak te kha tun a ṭhalaite hian kan ngaih hlut thiam a pawimawh thu a sawi. Hmasawnna tluantling awm tur chuan mahni hnam ngaih hlut nachang hriat leh hnam ziarang humhalh a chawisan duhna inzirtir thar a ṭul thu a sawi bawk a ni.

Govt Kolasib College Cultural Club aṭangin hnam lam hmuhnawm tak en ho a ni.

Y20 Meet on Patriotism, Nationalism & Development hi Y20 Secretariat, Ministry of Youth Affairs and Sports (GOI) hnuaia buatsaih a ni.