Hnahthial SP-in MLA inthlan inbuatsaihna atan NGO hruaitute kawm

Aizawl | August 25, 2023: Pu Vineet Kumar, Superintendent of Police (SP) Hnahthial District chuan kumina MLA General Election lo awm tura venhimna inbuatsaihna atan vawiin khan Hnahthial khawpui chhunga NGO hrang hrang hruaitute kawmin inthlan felfai tak neih a nih theih nan hmalak dan tur te a sawipui.

SP Pu Vineet Kumar chuan ram hruaitu thlan hun kumina thleng turah sawrkar a inbuatsaih nasa tih a tarlang a, inthlan felfai leh tluang taka neih chu sawrkar in a ngai pawimawh hle tiin tun thla ni 29 hian Election Commissioner of India pawhin Mizoram a rawn tlawh dawn a ni a ti. Inthlanna felfai leh thianghlim tak a awm theih nan thawhho that a tul hle a, dan ang lova campaign te, thil fel lo tih tum leh ruihhlo hmanga campaign awm thei te chu dan in a phal loh thil a nih avangin khap tlat a nih thu tarlangin lo ti an awm a nih chuan police te hriattir vat thin turin kalkhawmte a ngen a, a hriattirtu hming leh nihnate chu thup tlat tur niin lawmman pawh pek tlak an nih chuan pek an nih tur thu a sawi a, theih tawp chhuahpui turin a ngen a ni.

He hunah hian NGO hrang hrang hruaitute pawhin an ngaihmawh zawng leh tha an tih zawngte huam zau takin an sawi a, theih tawp chhuaha police-te thawhpui an in huam reng thu an sawi bawk.

SP Pu Vineet Kumar hi Pu Albert Lalnunpuia, Addl. SP, Pu Lalnithanga, SDPO ten an tawiawm a ni.