Chief Minister-in Zemabawka in chim a tlawh

Aizawl | August 19, 2023: Vawiin khan Chief Minister Pu Zoramthanga chuan a bial chhung Zemabawk Bethel venga Pu KC Zauva te chungkaw chenna in nimin tlai dar 4:30 vela chim a tlawh.

Chief Minister chuan pu KC Zauva te chhungkaw vanduaina chu pawi a tih thu hrilhin, a hmunhma te sak leh theihin han thian fel se la, a tul ang zelin kan inpui dawn nia tiin a chah a. An kawt kawngpui kal zelin a piah lawkah sawrkar sak mek Futsal Ground a chhun a, Futsal Ground panna lamlian tur a nih avangin nakin lawkah tha taka la siam tur a nih thu a hrilh a ni. Chief Minister hian hnatlangte thingpui lum nan Zemabawk West Branch YMA kutah Rs. 5000 a hlan bawk.

Pu KC Zauva te hian an in, Assam type sak thar hi tunkar nilaini khan an luahlut, nimin tlai lam ruahpui sur lai khan vanduaithlak takin a chim ta a ni. A chim lai hian an chhungkua member palite leh an hnathawktute an awm a, hliam te chu nei hlawm mahse an nunna atana hlauhthawnawm tham harsatna an tawk lo nia sawi a ni.

Tukin zing lamah Aizawl District Disaster Management Authority lamin an tlawh tawh a, chhun lamah khawtlang mipui tlawmngaite nen an senghawi zui a ni.