Ayushman Bharat Digital Mission Microsite Project hawng

Aizawl | August 23, 2023: Ayushman Bharat Digital Mission (ABDM), Mizoram chuan vawiin khan Aijal Club-ah Microsite Project hawnna hun an hawng. Health and Family Welfare Department Additional Secretary Bethsy Zothanpari Sailo chuan khuallian niin he hun hi a hmanpui.

Ayushman Bharat Digital Mission (ABDM) hi September 27, 2021 khan Prime Minister, Shri Narendra Modi-a chuan India ram chhunga healthcare system te Information Technology (IT) hmanga tih changtlun anih theih nan Ayushman Bharat Digital Mission (ABDM) hi a tlangzarh a. Mizoram-ah pawh he programme hi October 2022 atanga kalpui tan a ni.

Ayushman Bharat Digital Mission (ABDM) hnuaiah hian India ram pumah healthcare system te digitization hna kalpui mek a ni a. Chungah chuan doctor, nurse, healthworker, damdawi in, laboratory leh health facilities hrang hrangte ABDM hnuaia register leh India khua leh tuite ABHA (Ayushman Bharat Health Account) hmanga an damlohna leh inentirna te digital health records lo siamsak hnate kalpui a ni a. Mizoramah pawh he digitization hna hi sawrkar damdawiin te leh health facilities hrang hrangahte kalpui mek niin mi 3,61,058 ten health account (ABHA) an nei tawh a ni.

Central sawrkar chuan India ram chhunga private clinic te, private hospital te leh private laboratory te chu chak zawka ABDM huang chhunga seng luh an nih theih nan “Microsite Project” tih chu a rawn duang chhuak a. Pilot phase hi Mumbai, Ahmedababd leh Surat khawpuiahte hlawhtling taka neih a nih hnuin ram pum huapin “100 Microsite Project” tih chu a tlangzarh leh ta a ni.

He Project hnuaiah hian India ram pumah Mizoram chu Microsite din hmasakna ber niin hemi project hnuaiah hian private health facilities te ABDM hnuaiah digitization hna kalpui a ni dawn a ni. A bul tanna turin Aizawl district chu thlan phawt niin he hna thawk tur hian Youth for Action, tuna State TB Elimination Programme nena thawk ho mek chu Interfacing Agency ah ruat an ni a, anni hian ABDM nen tang kawpin private health facilities te leh a chhunga thawkte ABDM hnuaia digitize turin hma an la dawn a ni.

• • • • • •

Scan Here to Donate!