A ṭum thumna atan 'Lehkhabu Pho Runpui' buatsaih leh dawn

Aizawl | August 12, 2023: Mizo Writers Association chuan September 11 - 16, 2023 (Thawhtanni - Inrinni) chhung hian Vanapa Hall hulhliapah a ṭum thumna atan lehkhabu pho rùnpui an buatsaih leh dawn.

Lehkhabu Pho Rùnpui (LPR-3) hunah hian 'Mizo Writers Association'  member te chauhin lehkhabu an pho thei dawn a ni.

LEHKHABU PHO RÙNPUI

*(LPR - 3)*

_Ni 11 - 16 September, 2023 (Thawhtanni - Inrinni) chhung hian "Mizo Writers Association" huaihawtin Vanapa Hall hulhliapah lehkhabu pho rùnpui neih a ni leh dawn a. Chuta hriattur pawimawh zualte han tarlang ila:_

1. Lehkhabu Pho Rùnpui (LPR-3) hunah hian 'Mizo Writers Association'  member te chauhin lehkhabu an pho thei dawn a. Lehkhabu rawn phote tan engmah insensona tur a awm dawn lo. Ziakmi zinga MWA member la ni lo kan awm a nih chuan engtiklai pawhin membership fee Rs.200/- pe in member a nih theih reng e. (Hei hian chhungte lehkhabu zawrhsak tur a huam lo ang).

2. Lehkhabu Pho Rùnpui pual Whatsapp Group siam a nih dawn avangin lehkhabu rawn pho tur neite chu a rang lama Organizing Committee Secretary (8974348598) hnenah Whatsapp kaltlanga inhriattir zel tura ngen kan ni.

3. Lehkhabu Pho Rùnpui-ah hian lehkhabu tlangzarh rùnpui a awm leh dawn bawk a. Lehkhabu chhut thar leh kum 10 chuang a copy awm tawh lo chhut nawn lehte a huam ang. Lehkhabu pho chhuah tur leh tlangzarh tur nei chuan Organizing Secretary '8974348598' (Whatsapp) hnenah ni 5 September, 2023 (Thawhlehni) ral hma ngeia inhriattir tur a ni. 

4. Kan lehkhabu thutpuitu tur kan intodelh thei a nih chuan duhthusam a ni a. Amaherawhchu, kan nei remchang lo a nih pawhin Organizer ten kan lehkhabu min zawrhsaktu tur kan ngaihtuahsak thei dawn a. A lehkhabu pho tu te tan engmah insênna tur a awm dawn lo.

5. Ni 9 September, 2023 (Inrinni) hi insingsak fel ni tura ruahman a ni a. Lehkhabu pho chhuah tur nei zawng zawngte chu chawhnu dar 1 atangin rawn chhawplâwk tura beisei kan ni. A tul angin kan dawhkan tur theuhte siam fel nghal a ni ang.

6. Lehkhabu discount chungchang chu a lehkhabu neitu kutah a innghat a. Organizing committee lam a inrawlh lo ang.

7. Lehkhabu pho rùnpui hi "Mizo Writers Association" ten Art & Culture Department nen tangkawpa Ziakmite chawisainna tur liau liaua huaihawt a ni a. A lehkhabu hralhna zawng zawng pawh hi lehkhabu neitute kutah zel a lut ang. "Mizo Writers Association" pawla anga a sum leh pai zawnga hlawkna tel tur pakhatmah a nei lo. Amaherawhchu, lehkhabu rawn pho apiangte hian MWA library-a dah turin an lehkhabu rawn pho copy 1 theuh rawn pe (donate) zel tura beisei kan ni thung.

_*Sd/-*_

_*K. Remruatfela*_

_*Organizing Committee Secretary*_

_*Lehkhabu Pho Rùnpui*_

_*Con. 8974348598*_

_*Mizo Writers Association*_

.