- K Remruatfela
Ni 28.6.2023 atang khan Tuipuirala Mizo hmunhlui pawimawhte zir chiang turin "Mizo Writers Association" te chuan Writers Tour kan nei a. Ni 3 leh zan 3 ngawt hun kan hman hnuah tluang takin ni 1.7.2023 khan mahni inlum lam kan lo let leh thei ta a, a chauh thlak rualin a lunglen thlak hle mai. Pathian min hruaina leh awmpuina a ropuiin a lawmawm tak zet a ni.
Tahrik 28 June, 2023 (Wed) vartianah Vanapa Hall kawt atangin kan chhuak tan a, Keitumah Tukthuan eiin tlai dar 4:00 ah Mizo history sawi nikhuaa hming dai tawh lo tur "Selesih Sangsarih khaw dinna hmun" Zawlsei khua kan thleng a. Zawlsei kan thlen hian YMA ten min lo dawngsawngin thingpui paw tui tak dawm ho pahin Selesih Sangsarih history sawihona hun kan nei a. A bengvarthlak hle. Hun kan hman zawh veleh kan thlenna tur lam, Khawbung Tourist Lodge kan pan leh vang vang nghal a. Zan dar 7:00 velah Khawbung Tourist Lodge-ah zanriah kan kil fel thei a ni.
Ni 29.6.2023 (Thu) vartianah tho in literature tuimi te tana tlawh mâkmawh leh kan hmunpui "Hla Kungpui Mual" kan fang a. Zahna chibai kan lan tir hnuah a piah deuha kan ziakmi fam ta te sulhnu an dahthatna hmun "Hla Kungpui Robawm" kan tlawh kual leh bawk a. Amah Pu Rosangliana'n thiam tak maia "Hranghlui zaimi/ziakmi fam ta te ka dâwn changin luaithlipui ka nûl leh thin" a lo tihte kha thinlung takin kan tawmpui hliah hliah a ni ber mai.
Tukthuan eikham veleh muangchang lovin pipu sulhnu hrang hrangte fang turin kan thawk chhuak nghal a. Hmatiam hmasa berah Thasiama Se no neihna hmun tlawh turin kan pan ding nghal a. A hmun kan thlen dawnin Chawngtui nula fel tak maiin min lo hmuak a. Ani ho chuan thangthar nun ninga fam ta, Thasiama sial in no a neih hmun chu a tak ngeiin kan han lawn kai ve ta a, mumang a ang rum rum mai. Kan tih tur te kan tih zawh hnuah Farkawn pan nghalin hmun hlui pawimawh chi hrang hrang - Lungkeiphaw tial, Chhura Chi rawt lung, Lianchia ral ven buk, Fiara Tui (Farkawn) te tlawhin haw kawngah Vaphai kai pheiin Kungawrhi Puk, Fiara Tui (Vaphai) leh hmun dang pawimawh tak takte kan tlawh kual a. Nihlawh kan intiin vannei kan inti hlawm tak zet!
Khua a lo thim dawn tihah kan innghahna hmun Khawbung panin kan chhuak phei leh a. Khua in min bumro san avangin haw kawnga tlawh tura hmachhawp hrang hrang kan neihte chu duh angin kan tlawh tha hman ta lova, a pawi kan ti hle mai. Zan dar 6:30 velah Khawbung Tourist Lodge thlengin zanriak kil zawh veleh Hla Kungpui Mual Committee, Khawbung te nen Zawlbukah "Thu leh Hlaa inkawm hlimna hun" kan hmang a. Kan vei zawng zawngte sawihoin hun hlung tak kan hmang ho thei a, kham lo takin zan dar 10:00 velah kan tin.
Tui taka kan mutthilh hnuah chuan a tukah remna ni duhawm tak a lo eng chhuak a. Hma takah tukthuan eiin kan inhampuar zawh veleh pipute sulhnu mak danglam tak tak awmna "Vangchhia Khua" (Vangchhe Khua tih tur awm tak a ni a) tlawhin Mizo mipuite sawi fâk "Kawtchhuah Ropui" an tih chu kan pan vang vang a. Hetianga thlanlung leh lungphun mak danglam tak hi engtinnge kan piputen khan min lo hnutchhiah theih ti-a rilrua inzawt melh melh chungin "Pipu chhuah tlang hlui a mawi ang e, Thar khawchhuah tlangah dawnlung an rem" tih hla kha kan rilruin kan sa vawng vawng mai.
Thla te kan han lakpui sang sang hnuah di zun ngaia kiu vawng vawng, an sawi lal fanu hmeltha, Lianchhiar Lunglen tlâng ngei mai chu kan han chuan a. Lungleng em ema a hmangaih, Chawngfianga tuallenna Hriangmual ngei mai chu, a thlirna tlang atang ngeiin kan zuk thlir pui a, rei lo te ah hriat lo laiin hmangaihna luipuiah min pil pui ve nghal veng veng thei zuk nia🥲
Tichuan, chawhnu hun a lo inher a, a chhak lawka Thangchhuah Mual an tih chu kan han fang thuak thuak a. Mi mi ropuite hming 50 zet an tlar chhuah laia Pu Ch.Saprawnga leh Pu R.Vanlawma te hming kan han hmu ve ta lo chu kalhkimlo kan ti tlang hlawm hle niin a lang.
Pathian hruaina leh awmpuinaa kan tlawh tur ruahman lawk angte chu kan tlawh kim thawkhat tawha kan inhriat hnuah East Lungdar hmuna zanriah kil hman ngei turin Luanchhiari tuallenna hmun chu kan chhuahsan a, zan dar 7:00 velah East Lungdar thlengin zanriah tuihnai tak kan kil ho a, kan puar tlang hle niin a lang.
Chutia zan 3 zet mahni in lum chhuahsana thu leh hla vanga kan feh chhuah tawh hnuah ni 1.7.2023 (Sat) a lo inher chhuah chuan vartianah thoin mahni inlam pan turin kan in ak chhuak ta hlawm a. Pi pu zûn ngaihnain min la chenchilh tlat avangin mahni in lam pan hi kan thlahlel nge kan hreh tlang tih pawh inhriatthiam a har ta hle mai.
Nimahsela, loh theih lovin hmatiam kan hlen a ngai si a, ngai leh lungleng em em chungin zing dar 5:00 chiah chiahah mahni in lum pan turin East Lungdar Tourist Lodge chu kan chhuahsan a. Kan lung a leng tlang bawk a niang, kal lam ang lo takin haw kawngah chuan tumah che châng peih reng kan awm lo. Kan infahtawn tam ber chu khua reiah kan va la ngai dawn em tih leh Khawbung Tourist Lodge enkawltu nula pahnih mawlh maite kha an va felin an va hawihawm tak em tih hlir a ni a. "God be with you till we meet again" tih hlate kha an lo va phuah fuh tak em em tiin mahni leh mahni kan inkawm mawlh nawlh mai.
Chutah! chutia rilru hnim taka zinkawng kan zawh haw lai chuan kan khawharna leh lunglenna belhchhah turin amah Sailothangi aw nem no, ngaihno bei tak ngei chuan "Bahsam tha seihniang, My P.P. O'Di, A riangval lung her nan maw" ti chuai raihin min han awi del del a, hmangaihna luipui an tih mai, mississipi luipuiah chuan kan zavai mai hian kan pil tlang del del ni ber mai hian a hriat!
Engtikah tak heng hun hlimawm tak hi tawng leh ang i maw ti rilru neuh neuh chungin chawhnu dar:1:00 ah Zawlkhawpui kan lut a, pakhat zela an kal bovin an kiam thin chhungkaw tinreng tih ang deuhin kan in tinsan pheuh pheuh a, chutiang chuan kan tuipuiral zinkawng chu kan lo zawh tawp ta a ni. Khang hun hlimawm tak te kha kan va la ngai dawn em khuareiah!!😢😢
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: