Nationalism training centre-ah Lalpa'n he HNAM hi na takin a hrual mek a ni tih lo hre hram rawh

✍️ Remmuana Chawngthu

    Manipur-a kan unaute thlavang hauhna kawng zawhah ka tel ve a, tih theih chin tawk hi a sang lo hle mai a, a inthlahrunawm zawk hial mai. Zirlai pawl leh pawl hrang hrangin kawng zawh hi a chhan hrang hrang avangin an lo buatsaih fo a, kei ngei pawh hi ka tel ve fo mai. Mahse, tun ṭum ang em em a mipui ṭhahnem leh Mizo fa hui khawm nasa kawng zawh hi ka la hmu lo, midang pawhin an hmu tam bik lo tawp ang; ka tel ve thei hi ka lawm hle a ni.

Ka lo sawi zui nghal vat ang e.

Tunhma aṭanga hnam/ram thuthlung leh a kaihhnawih thil eng eng emaw buaipuitu an awm hian, mi nawlpui hian an bengkhawn lem lo a, a ti peih fal deuh phei chu mi tlem te an ni. _Hnam thinlung pu chung a, lungrual ṭhapna hun hi tun ang ṭhangtharte hunah a thleng thei mai mai dawn lo a ngaih hnuah, tunah chuan a thleng ta.

 Chumi thleng tur erawh chuan kawng a lo awlsam lo hle mai; heng - thihna, mualphona tawpkhawk tuarna, tuihal leh rilṭamna, mangan leh thlabarna, neih ro thil tam tak chânna, hliam na tak bakah rilru leh taksa hahna leh hrehawmna dangte hmangin hrin chhuah a lo ngai takzet a lo nih hi.

Peniel hmun leh tuna Zo hnam:

Jakoba tan Peniel chu malpui ruhchuktuah tih-pelhsawlhna, chakna thahrui tihchhiatna, mahni chakna ringa thawh theih tawh lohna - hun lungchhiatthlak tawnna hmun ni mahse; a tan Pathian remruatna ropui lo lanna hmun, Israel fate tan an pu Jakoba'n malsawmna ṭha-mi a dawnna, hming thar (Israela) a neihna hmun a ni ve thung.

Hrehawmna sawi fiah thiam sen rual loh khawpa nasa tawhna hun lo ni rih mahse, tun hi; malsawmna ṭha-mi, ropui taka he hnam din chhuahna tur kailawn pawimawh a ni lo ang tih tunge sawi thei?

Rorelna pakhat hnuaia insuihkhawm emaw, independent dinhmuna ding a, chutiang malsawmna par chu a nihna dik taka tlan tur chuan; INHMANGAIHNA LEH INLUNGRUALNA ṭha tawk tak lo neih hmasak a ṭul tih hi a lang chiang em em a, chu thil pawimawh pahnih chu nei turin tunah hian he hnam hi Pathianin a buatsaih mek a ni tih hi kan hmu fiah ṭan em le aw?

Hun ṭha leh nuam nei a, hnam ropui zawk din chhuak turin thil hi a kal miah miah mai a. Malsawmna thar zawk lo dawngsawng ṭha thiam thei turin tunah hian Pathianin he hnam hi zirtirna na takin a hrual rih mek a ni.

"... Lalpa chuan lungngaihna châw leh  Hrehawmna tui pê che u mah sela, In zirtîrtute chu hmun kilkhâwra sawn an ni tawh lo vang a, In mitin zirtîrtute chu a hmu pha reng zâwk ang. Ding lamah emaw, vei lamah emaw in pên dâwn chuan, 'Hei hi kawng chu a ni e, zawh rawh u,' tiin, hnung lam aṭangin thû in hria ang." (Isaia  30:20,21 - King James)