Mizoram University (MZU) Varsity Miss 2023 Vanlalnuntluangi kan belchiang.
V emaw Vv emaw a koh thin Varsity Miss 2023 Vanlalnuntluangi hi Jan 4, 2002 khan R Vanlalruati leh H Lalrindika inkarah a piang a. Unau pathum zînga a upa ber niin, nau mipa leh hmeichhia a nei.
Ft 5'7 a sang Vanlalnuntluangi te hi an chhungkuain Thuampui, Aizawl-a awm an ni a, Kohhran lamah chuan The Salvation Army a lawi an ni.
Vanlalnuntluangi'n Explore Mizoram zawhna a chhannate:
📌 Zirna lam:
~ Pawl 10 hi Govt. Mizo High School atangin ka pass a, Pawl 12 hi Govt. Zemabawk Higher Secondary School atangin ka pass leh a, B.A (Education) hi PUC atangin ka zo leh a, Tunah hian Mizoram University-ah Bachelor of Education, III Semester ka zir mêk a ni.
📌 Hobby: La phiar, Lehkhabu chhiar, Ei siam.
📌 Duhzawng leh ngainat zawng hrang hrangte?
• Lehkhabu: Ka ngah lutuka thlan a har, tunah rih chuan, Postscript by Cecelia Ahern.
• Actor/Actress: Henry Cavill
• Zaithiam: Hozier, Taylor Swift
• Chawhmeh: Alu
• Hla: Vienna by Billy Joel
• Hmun: Kan In
• Ziaktu: Ka ngah lutuk lol
📌 Mize ngainat zawng:
~ Zaidam, mahni thusawia ding mi leh mahni in ring tâwk tak.
📌 Mize ngainat loh zawng:
~ Ngaihtuahna fîm hmang lova ri buan buan ṭhin mi leh mi chapo.
📌 Kawppui tura duhzawng?
~ Pathian ṭih mi, ruihtheih thila fihlim, mahni inringtâwk tak leh tlâwmngai.
📌 Relationship status: Single.
📌 Aim in life: Zirtirtu.
📌 Varsity Miss 2023 atan thlan i ni a, he dinhmun hi i luah i inring reng em?
~ Pathian nên chuan theihloh a awmlo tih ka hria a, chuvang chuan ka luah theih ngei ka ring.
📌 Varsity Miss 2023 atan nominee dah i ni tih i hriat leh Varsity Miss atana thlan i nih a i rilru puthmang leh i awm dan?
~ Varsity Miss tûrin department lamin min nominate tih ka hriat rual khân Pathian ka râwn nghal a, A thu ang zela awm turin ka in hlân a ni.
Varsity Miss puan anih dawn minute ah khân ka zâm ve em em a, ka sir lehlam lehlama ding tekha contest ṭan tirh atanga Miss nih phu ka tih ber ber te pahnih an ni a, khatia ka hming puan anih khân ka lawm em em a, ka thiam leh theihna vâng ni lovin Pathian vâng chauh a ni tih ka hria a, ka lawmna chu Lalpaah a ni.
📌 Modelling lam hi i tui reng em?
Aw, ka têt te atang pageantry (miss thlan) hi chu ka tui tawh a, modelling pawh hi ka tui viau.
📌 Varsity Miss hi thlan zel chiah i ngai em? A thlan danah te thurawn i nei em?
~ Aw, Varsity Miss hi thlan zêl a ṭha ka ti.
Tûn dinhmunah chuan Varsity Miss thlan dân hi a ṭha thawkhat viau in ka hria.
📌 Varsity Miss in i nuna nghawng a neih.
~ Varsity Miss tel tur te hi screening neih hnuah finalist thlan chhuah leh niin, chu'ng te chu kar khat chuang daih uluk taka enkawl (groom) leh kan ni a, kei pawhin kawng tinrengah hmasâwnna tam tak ka chhar chhuak a, chu mai piah lamah ṭhian ṭha tak tak te ka tawn phah a ni. Varsity Miss nihna hian mahni in vawn duhna leh midangte entawn tlâka nun duhna min pe a, Mizorama zirna in sâng bera zirlai sâng chuan represent ka nih tawh avângin nun uluk lehzuala hman ka duh phah a ni.
📌 Tuna MZU dinhmun, i hmuh dan?
~ Mizoram University ah hian zirlai, danglam leh inanglo tak tak sâng chuang kan awm a, hnam, state, tuina leh subject inanglo tak tak te, mahni kawng ṭheuha hmasawn tum rân mai te inlungrual taka kan cheng ho thei hi a ropui ka ti. Hmun hma leh hmanrua(materials) pawh kan nei ṭha tawk a, hma kan sâwn mek zel bawk a ni.
📌 Kohhran, Khawtlang leh nangmah?
~ Kohhran leh khawtlângah hian ka phâk ang tâwkin ka in hmang ve ṭhin. Zirlai kan nih chhung chuan lehkha zir hi kan hna an ni a, kan ngai pawimawh hle tur a ni. Zirna leh damlohna avanga remchân lohna kan nei a nih lem loh chuan kohhran leh khawtlang programme ah a tam thei ang ber ka tel ṭhin. Mahni in rintâwkna min pe tu leh mipui hmaa ding thei tura min chher chhuak tu chu kohhran hi a ni.
📌 Social media leh nangmah?
~ Tunlaiah chuan social media tel lo hian thil tih a theih tak tak tawhloh tluk a ni a, a hmang thiam tân chuan sumdâwnna atan leh thil dangah ṭangkai tak takin a hman theih a. Zirlaite pawhin kan hmang nasa in kan hmang ṭangkai em em a, zirnaa min puitu ṭha tak a ni. Khawvel changkânna in a ken tel tlat a nih avângin social media hi mahni in thunun tak chung si in, ṭangkai taka hman ka tum ṭhin a ni.
📌 Mizo hnam ṭhanmawh bawk nia i hriat?
~ Midangte ṭhatna aia an ṭhat tâwk lohna, sawisel tur zawng râna kan awm ṭhin hi. Hmangaihna avanga zilh hauna ni si lo, sawiselna leh midang deuna aw ka kan chhak chhuak fo hian mimal leh mimal inkârah inpawh lohna a thlen ṭhin a, khawtlang (society) chu mimal tam tak fuan khawmin a siam anih avangin hei hian khawtlang, ram leh hnam thlengin in lungrual lohna a thlen ṭhin a, thawhhona a ṭha thei ṭhin lo a, heihi kan hnam ṭhanmawh bâwk niin ka hria.
📌 Mizo hnam damna atana kawng awm nia i hriatte?
~ Pathian ṭih tlata, kan nitin nunkawngah dikna leh rinawmna vawn nun tlat te hian kan hnam damna a thlen ngei ka ring.
📌 Hnam chhan nana Hmeichhiate ṭangkaina leh mawhphurna?
~ Kan hnam chîm rala kan awm mai loh nan hmeichhia te hian kan kawppui tur atân mizo mipa ngei thlang thei ila tih hi duhthusâm a ni.
Nimahse, Mizorama death rate kan en chuan mizo mipa te hi a ni telin hmeichhia te aiin an tlem tial tial mai a ni a, heihi a bulpui ber chu mizo tlangval ruihtheih thila buai an tam lutuk avâng niin ka hria. Hun lo la awm zêl tura mizo nula te'n mizo tlangval, pasal tur an hmuh zawh loh mai loh nân ṭan lâk a ngai takzet a ni.
📌 Zofate inpumkhatna hi a thlen theih i ring em? Thleng thei turin engnge pawimawh nia i hriat?
~ Aw, Zofate inpumkhatna hi a thlen theih ngei ka ring.
Khawvel hmun hrang hranga chêng Zofate hi kan in hmangaih tawn tlata, harsat leh mangan ni khuaah pawh in puih tawn zel hi hnam inpumkhatna atân a pawimawh hlein ka hria.
📌 MZP in ZOFEST a buatsaih ṭhin hian Zofate inunauna kawngah a thawhhlawkin i hria em?
~ MZP-in Zofate inkhawmpui lian, ZOFEST a buatsaih ṭhin hi a hlu hlein ka hria. Tlâng hrang hranga Zo hnahthlâkte, râl aṭang mai ni lova hmaichhan ngeia inhmuhna remchang a ni a, hei hian inlungrualna leh inunauna nghet lehzual a thlen ngeiin ka hria.
📌 Hnam dang nupui pasal neih hi?
~ Nupui pasal neiha pawimawh ber chu hmangaihna hi a ni. Nimahse, Mizote hi hnam tlêm tê kan ni a, kan hnam kanlo pun deuh deuh theihna tur chuan kan hmangaih tûr kan thlanna kawngah hian mahni hnampui, Mizo ngei thlang thei ila tih hi duhthusâm a ni.
📌 I thalaipuite tan—
~ Pathian hnaih rawh u; tichuan, ani'n a hnaih ang che u. (Jakoba 4:8)
📌 EXPLORE MIZORAM i hmuh dan:-
Chanchinthar, a bik takin tualchhung chanchinthar te rang taka kan phone emaw device dang emaw aṭanga han hmehchhuah mai theih tura internet leh social media a chanchin update zung zung ṭhin tu, exploremizoram a awm hi a ṭha ka ti hle.
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: