Mizoram University (MZU) Bachelor of Science (B.Sc) Gold Medalist 2023 Jeffrey Vanlaltlana kan belchiang.
CGPA- 9.56 hmua MZU hnuaia B.Sc Gold Medalist 2023 Jeffrey Vanlaltlana hi Jeffrey tia koh thin niin, April 13, 2001 khan Lalvulluaia Khiangte leh Jenny Lalthazampuii te inkarah a lo piang a, unau pali zinga naupang ber dawttu niin, farnu pakhat an nei a ni.
Jeffrey Vanlaltlana te hi Tuikual South, Aizawl-ah an awm a, kohhran lamah chuan Presbyterian Kohhran-ah an lawi a ni.
Jeffrey Vanlaltlana'n Explore Mizoram zawhna a chhannate:
📌 Zirna lam:
~ Pawl 10 leh 12 hi St. Pauls Higher Secondary School atangin 2018 leh 2020 khan ka pass a, BSc Biotechnology hi Pachhunga University College-ah zirin, kumin 2023 ah tha takin ka zo a ni.
📌 I lehkha zir dan?
~ College-ah hian pawl X leh XII a lehkha ka zir ang em em chuan ka zir nasa lova, test leh exam dawnah chuan theihtawp chhuahin ka zir thin a, material te pawh ka theihtawpin ka la khawm thin.
📌 harsatna I hmachhawn dan?
~ Ka harsatna tawh te Pathian hnenah ka thlen hmasa phawt a, ngunthluk taka ka ngaihtuah hnuah hmachhawn dan tha ber nia ka hriat angin ka hmachhawn thin a ni.
📌 Gold medalist i nihna (Subject) leh CGPA?
~ B.Sc Gold Medalist niin, B.Sc Biotechnology-ah CGPA- 9.56 ka hmu a ni.
📌 Gold medalist ni tura i beih dan?
~ Gold medalist ni tur hian ka bei hran lova, lehkha erawh chu theihtawp chhuahin ka zir ve thin. BSc-a kan zir tam zawk hi pawl XI leh XII Biology-ah a basic kan zir deuh vek tawh a, (college level hi a chipchiar deuh zawk a) a hmaa ka lo zir thatna khan min pui nasa em em a ni.
📌 Gold medalist ni tura i beihnaah faculty lamin an ṭawiawm/pui ṭha chein i hria em?
~ Material min pe tha thei khawp mai a, an material min pek bakah an zirtirna pawh a tha ka ti hle.
📌 I zirna atana i chhungte pawimawhna:
~ Ka chhungte hian min ring tawkin ka thiltih tam zawk hi min chu support em em a.
- Offline-a kan kal hnu 5th leh 6th Semester chhung te khan lassi leh pickle ka zuar thin a, ka thil zawrhna tur dahthat nan fridge te min leisak a.
- Hun awl min siam sak thin a zarah, American writer heta research rawn nei hi a thu hriat thiam lohte letlingin pawisa ka inhlawh theih phah bawk a.
- Mahni duhzawng leina tur te, cafe kalna tur te, gym monthly fee leh state danga zinna tur hi ka in tuak thin a, college kal rual nih ve uk tawha chhungte pawisa han dil reng hi inthlahrunna chen ka nei a.
📌 I zirna atana i ṭhiante pawimawhna:
~ Biotechnology ka la nangin Biotechnology bikah hian thian kawm chawt pakhat ka nei a. Ka thian tam zawkte chuan Philosophy, Zoology, Sociology, Economics, English leh Psychology te an la a. An ti ti atang hian an subject topic hrang hrang hi ka lo inchhiar zau phah ve a, an ti ti lo man phak a, lo zawm ve hi ka duh ve thin sia. A bik takin Philosophy zirlai phei chu thil ka hriat zau phah khawp mai.
📌 COVID 19 in i nun leh zirnaah nghawng a nei em? A neih chuan, nghawng a neih dan?
~ Aw, Covid 19 khan a tha zawngin ka zirnaah nghawng a nei a. Covid vanga ina kan in-quarantine chhung khan lehkha ka zir nasat phah hle.
📌 I duhzawng leh ngainat zawngte:
• Rawng - Black
• Chawhmeh - Alu, bete chhum han
• Incheina - Converse, T-shirt, jeans/pajama, cap leh college sling bags ( loose fit deuh hlir ka ha thin)
• Rimawi – Mizo rimawiah chuan Pi Vanlalruati (Zoawi lelte) hi ka ngaithla nasa khawp mai a. Korean indie band ho hi ka ngaithla nasa bawk.
• Mizo Ziaktu zingah - KC Lalvunga (Zikpuii pa)
• Hla - Khawvel thil tinreng leh lunghlu
• Hla phuahtu - Zirsangzela Hnamte
• Teacher - Ka nu leh pate
📌 Mize ngainat zawng:
~ Mize thup lo, mahni nih ang anga langchhuak thin mizia hi ka ngaina
📌 Mize ngai nat loh zawng:
~ Midangte hmu hniama mahni dik bera inngai. Mahni in dah sang lutuk mizia hi ka ngaina lo.
📌 Hobby
~ Zai, lemziah (sketching leh painting), trekking
📌 Relationship status
~ Single
📌 Kawppui atan duhzawng
~ Ka la ngaihtuah chhin ngai lo.
Zawhna dang:::
1. A tel lova i awm theih loh:
~ Ka chhungte, ka phone leh ka tui bottle.
2. I nun kaihruaitu:
~ Pathian leh ka nu leh pate.
3. Hringnuna i hlauh ber:
~ Ka chhungte leh thian tha te chan. A nung chunga phum nen.
4. I tih ngai miah loh tur
~ Zuk leh hmuam.
5. Mizo Tualzal nuna ṭha i tih:
~ Rinawmna hi Mizo tualzal nuna tha ka tih pakhat a ni a. Tlawmngaihna leh taihmakna te, riangvai leh chanhai indawm kanna thinlung te hi tha ka ti hle bawk.
6. Quote i duh ber:
~ Don’t always carpe the diem.
7. Hnam hmingṭhat leh hmingchhiat kawngah Mipate mawhphurhna leh Hnam chhan nana Mipate ṭangkaina leh mawhphurna?
~ Mipa lu Krista a nih avangin Krista vuan tlattu mipa chuan hnam hmingchhiatna a pumpelh ngei ngei ka ring a.
Zirna kawngah emaw hna chungchangah emaw a ber ni tura theihtawp chhuah leh rinawmna vawn nun hi hnam hmingthatna kawnga kan mawhphurhna a ni a, state dang leh ram pawn thleng pawhin a ber nihna hauh thei khawpa rinawm leh taima taka kan zir/thawh chuan kan hnam hming a ti tha lo theilo.
Hei mai bakah hian kan hmeichhiate zahawmna kan humhimsaka hnamdangte mithmuha zahawm taka Mizo mipaten kan enkawl chuan hnam hmingchhiat na laka kan mawhphurhna kan hlen ka ring hle bawk.
8. Hnam ziarang chawinun kawnga Mipate mawhphurna:
~ Khawi hmunah pawh awm ila Mizo society a bet tlat tlawmngaihna leh rinawmna vawn nun te, kan hnam ziarang leh tihphung te thlauhthla lova midangte entawn tura vawng nungtu nih hi a pawimawh ka ti.
9. Mizote tan 'Fa neih tlem' inzirtir hi a ṭulin i hria em?
~ Fa neih tam leh neih tlem chu a enkawltu tur (an nu leh pa tur te) thu thu niin ka hria. An inhuam dan a zir te, an chawm zawh theih dan tur a zir tein family planning mumal taka siam phawt hi tha ka ti . Chawm zawh loh tur fa tam tak neih hi a tha ka ti lo.
10. Mizo hnam ṭhanmawh bawk nia i hriat?
~ Kohhran leh khawtlang hian sum ngah leh thawh hnem thei mite hi a lawm lutuk a, mahni thawhchhuah aia sanga khawsa eiru ngei ngeia kan hriat te pawh kohhran leh khawtlangah sum an chhun luh hnem chuan kan chung en tlat mai te, kan be chhe ngam miah lo mai te hi chu a zia lo ka ti ve thin khawp mai.
Hei hian eiru te leh dik lo taka sum la lut thin te a tih huangtau phah em aw, corruption a tih hluar nasat phah mai em aw tih min ngaihtuah tir thin.
Hnam changkang zawkte nun dan te, inchei dan te leh khawsak dan te kan entawn a, khatianga nung tura harsatna an hmachhawn te leh an thawhrimna te kan entawn leh si lo thin hi kan thanmawbawk pakhat niin ka hria.
11. Mizo hnam damna atana kawng awm nia i hriatte?
~ Mizote hian thil dik lo hi do ngam ila. Diklo taka sum lalut nia kan hriat te hi kohhran leh khawtlangte hian kan ram hmasawnna dipdaltu a ni tih hriain do ngam ila.
Huaisen taka thudik tantu mi rinawm leh taima te ngaihsan zir ila.
Mihring chhungril thatna hmangaihna, rinawmna leh tlawmngaihna te hi kan chawikan fo hi pawimawh ka ti hle bawk.
12. Zirna, Khawtlang leh Kohhran hi?
~ Zirna, khawtlang leh kohhran hi a kalkawp thei viauin ka hria a, mahse zirlai kan nih chuan kan first priority chu kan zirna hi ni thei se tha ka ti. Kan hun awlah khawtlang leh kohhrana inhman hi zirlai tan chuan kan tih makmawh niin ka hre bawk.
13. Khawtlang, Kohhran leh nangmah:
~ Khawtlang leh kohhranah hian ka theihtawkah chuan ka inhmang ve a. Ka dam phawt chuan mithi lumen naah hian ka kal ngei ngei thin.
Kohhran-ah pawh hian ka theihtawkah chuan ka inhmang ve bawk.
14. Social Media leh Nangmah:
~ Social media hian ka zirnaah min pui nasa hle a. Social media hi ka khawih nasa a, ka zirlai chhiar zau nan ka hmang nasa hle bawk.
15. Mizoram ṭhalai tam tak tlakchham:
~ Rinawmna, taimakna, tih tak tak na rilru leh mahni kea din tumna kan tlachham ta hlein ka hria.
16. Mizo ṭhalaite hian ngaihsan tur dik an ngaisangin i hria em?
~ A tam zawk hi chuan kan ngaisang lo ka ti. Mi dik leh rinawmte aia diklo taka hausa leh nihna sang zawk chelhtute kan ngaisanga kan tlawn tlat mai hi pawi ka ti hle.
17. Ngaihsan tur dik nia i hriat:
~ Mihring chhungril thatna taihmakna te, tlawmngaihna te, rinawmna leh hmangaihna te hi ngaihsan tur dik niin ka hria.
18. Hlawhtlinna tura pawimawh:
~ Engkima hlawhtling tur chuan mahni inthununna (discipline) tha tak neih hi a pawimawh ka ti a. Tih hram hram peihna (consistency leh perseverance) hi pawimawh ka ti hle bawk.
19. hloh i hlauh ber:
~ Ka chhungte leh ka thiante hi hloh ka hlaua. Mi ngaihdan ka ngaih pawimawh lutuk luatah keimah ka inhloh ka hlau bawk.
20. Hnam dang nupui pasal neih hi-
~ Ka support chuang lova, an hmangaiha an nei a nih erawh chuan ka sawisel chuang lo.
21. Nupui pasal inneih hmaa mipat hmeichhiatna hman hi?
~ A tha ka ti lo.
22. Hlawhtlinna hi?
~ Hlawhtlinna hi ho tak nia lang atanga intan a ni a. Tui far khatin tuifinriat a siam ang hian kan thiltih ho te nia lang, consistent deuha kan beih tang tangna hian a tawpah hlawhtlinna min thlen thin.
I thalaipuite tan fuihna---
~ Nunah hian Pathian tih chunga, thil tam thei ang ber tawnhriat nei turin ka duh pui a. Nun hi a rei si lova, hun kan neih ang chhun chhun te thil tam tak a nuam leh a hrehawm pawh hmachhawn turin ka duhpui hle a ni.
Horace-a chuan “Carpe diem” (seize the day) tiin mi zawng zawngin kan hun neih ang ang te am taka chen turin min duhsak hle a, amaherawhchu engtik lai mai pawha kan hun neihchhunte ho lam taka kan chen reng hian ram ropui tak min thlen dawn loh avangin, “Don’t always carpe the diem” tiin ka thalaipuite ka rawn fuih ve a ni.
EXPLOREMIZORAM.COM i hmuh dan:
~ An thawhrimna hi fakawm ka ti a, Thilthleng chanchin rang taka an la khawm thei leh an taihmakna leh thawhrimna te hi a chhuanawm hlein ka hria.
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: