Aizawl | July 1, 2023: Mizo Zirlai Pawl (MZP) General Headquarters, Aizawl buatsaihin nizan dar 8 khan Vanapa hall-ah Remna Ni 2023 lawmna hun hman a ni a, Chief Minister Pu Zoramthanga chuan khuallian niin a hmanpui.
.jpg)
He hunah rambuai laia remna zawnga kohhran hruaitute'n theihtawp chhuah a tha an thawh avangin Mizoram Kohhran Hruaitute Committee (MKHC) hnenah chawimawina hlan a ni.
Chief Minister chuan MZP in Remna Ni puala hun an buatsaih chu lawmawm a tih thu a sawi a. Remna thuthlung ziah zan tluka mipui an hlim leh lawm kha Mizoramah sawi tur a la awmlo tia sawi thin a nih thu leh, hun kal zelah erawh chhan hrang hrang avangin remni ni pawimawhna a lo chul zel tak thu a sawi a. Tun hnu ah Remna Ni pawimawhna chuai tan tawh leh hnam thinlung uai thla rawn nawrkang tute chu thangtharte, zirlai te, kan thalaite an ni, a ti a. Remna nei tura kalkawng biboh tak leh harsa tak te, thil thleng tam takte chu sawi zui a hlawh lohva emaw, ngaihpawimawh a nih loh chuan kan history a thil pawimawh tak chu engmah lovah a chhuah theih laiin, thahnemngai taka thang lo thar leh zel te'n hnam chanchin leh hun kal tawh a thlir let a an hriatthiam theih tura ruahmanna an lo siam chu ropui a tih thu sawiin MZP chuangah lawmthu a sawi.
.jpg)
Pu Zoramthanga chuan hnam thinlung put hi ram hung nan, kan him nan a pawimawh a ni tiin, ramin hun khirh a tawn changin a lo fiah zual thin thu a sawi a. Hun in a finfiah tawh kum 37 zet lo ding nghet remna Mizoramin a neih chu a tluk zo kan chhehvelah emaw India ramah a la awm loh thu a sawi a. He kan remna hi entawn atan, khawvel hmun dangah pawh kan kalpui zel theih nan, tlansan lovin Pathian in a duh anga a kaihhruai turin i awm tlat ang u tiin mipui a sawm a ni.
MZP President Pu Lalnunmawia Pautu chuan thu sawiin, Hnam dang pasal nei, sa emaw vai pasal nei pawh kan rorelna sanga thut tuma bei an awm tih sawiin, MZP chuan ngun takin a ngaihtuah a, kan pi leh pu, kan sipai huaisen, hnam pasaltha ten zalenna, rorelna kan neih an sual chhuahah hian an thut ve kan rem ti lo," a ti a. "Theih tawpin kan dodal zel dawn," a ti bawk.
.jpg)
Inkhawm hi Vice President Pu Andrew F. Lalramnghaka huan kaihruaiin General Secretary Pu Jacob Lalmuanpuia hnen atangin report ngaihthlak a ni a. Asst. General Secretary Pu Chinkhanmanga Thomte chuan chawimawina hlanna hi a kaihruai a ni.
He hunah hian Greenland HSS, Mount Carmel HSS, St Anthonys HSS leh St Joseph HSS zirlaite atangin Hnam lam, lem chan leh zai te ngaihthlaka thlirho a ni a. Zirlai pawl hrang hrang leh tlawmngai pawh hrang hrang hruaitute leh political party aiawhte he programme ah hian an tel a ni.
.jpg)
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Post a Comment
He post chungchanga i ngaihdan lo sawi ve rawh: