MSU-in Central Agricultural University (CAU), Imphal-a Mizo zirlaite harsatna chungchangah Governor hmu; Zirlaite tan a him loh vangin zirna in danga sawn ngen

Aizawl | July 31, 2023: Mizo Students’ Union General Headquarters, Aizawl chuan vawiin ni 31, July 2023 khan Central Agricultural University (CAU), Imphal-a Mizo zirlaite harsatna chungchangah Mizoram Governor Pu Hari Babu Kambhampati hmuin, an harsatna chin fel a nih theih dan tur an thlen.

Governor hi MSU President Pu Samuel Zoramthanpuia hovin CAU zirlaite nen hmuh a ni a, zirlaite tan tunlai Manipur State-a buaina avangin Imphal-a zir chhunzawm chu a him loh thu leh an zirna a bahlah loh nan zirlai 28-te chu State dang institution-a transfer tura hma laksak turin MSU chuan Governor hnenah hian an thlen a. Manipur State-a Mizo zirlaite chu an him zawk nan State dang zirna ina transfer hian hun a duh rei theih avangin August thlaa Admission ti tur leh Exam hmachhawn turte tan online hmanga tih a nih theih nan hma lakpui thuai turin Governor chu an ngen nghal bawk a ni.

Governor chuan MSU thlenna te chu ṭha taka lo dawngsawngin hma a la nghal a. Central Agriculture University (CAU), Manipur Vice Chancellor Dr. Anupam Mishra chu be pawp nghalin August ni 2-ah Aizawl-a MSU hruaitute leh Zirlaite nen hmaichhana indawrna neih theihna tura ruahmansak nghal a ni. MSU chuan Mizo Zirlaite harsatna kan thlen leh hma lakna chak tak chungchangah Mizoram Governor chungah zirlaite ai awhin lawm thu a sawi tak meuh meuh a ni.