Mizoram Tourism-in Swadesh Darshan 2.0 chungchang sawihona buatsaih

Aizawl | July 31, 2023: Mizoram Tourism Department chuan vawiin khan Chaltlang Tourist Lodge-ah Interactive Session with stakeholders on Swadesh Darshan 2.0 an buatsaih.

He hun hi Mizoram Tourism Joint Secretary, Mizoram Tourism Development Authority Member Secretary ni bawk V Lalengmawia'n a kaihruai a, Mizoram Tourism Director Saitluanga'n Mizoram Tourism dinhmun leh chanchin tlangpui a sawi.

Swadesh Darshan 2.0 chungchang sawihona leh inkawmhona-ah hian Mizoram Tourism atangin Deputy Director Dr Lalrinchhani, Joint Director Lalthakimi leh Deputy Secretary Zonunthari te'n thupui hrang hrang an sawi a, Egis India Consulting Engineers Pvt Ltd atangin Swadesh Darshan 2.0 hnuaia Aizawl District leh Champhai district chhunga Tourism atana hmasawnna hna thawh dan tur leh thawh tum dante ngaihthlak a ni bawk.

Swadesh Darshan 2.0 hnuaiah hian Mizoram-ah Aizawl leh Champhai district te a huam dawn a, Tourism deptt hnuai-ah khualzin mite hipna atan hmasawnna hna thahnem tak thawh a ni dawn a ni.

He hunah hian, Mizoram chhunga Tourism tihlarna kawnga hmalatuten sawm an ni a, Adventure Sport tuipuitu leh Mizoram Tourism hmasawnna atana thahnemngai leh tuimite, khualzin mite lo dawngsawng leh enkawltute bakah website lama Mizoram tilartu Explore Mizoram sawm an ni bawk.