Aizawl | July 28, 2023: Mipui ngaihven leh ticket hralh zawh awlsam, 'Dampui Forest' chu nizan dar 8 khan a duh apiang en theih turin Vanapa Hall-ah tlangzarh a ni ta.
'Dampui Forest' hi nizan khan sawm bik tlemte leh ticket leitute nen en ho nghal a ni a, OTT ah dah a ni dawn a ni.
Thudawn danin, 'Dampui Forest' film ticket hi Vanapa Hall-a release na tur ticket an siam chu ni hnih chhungin an hralh zo vek a ni.
He film hi RUNMAWI apps ah cheng 200 chauhin a lei theih a, dah a nih atangin leitu pawh an ṭhahnem hle tih RUNMAWI apps aṭangin thu kan dawng.
Mart Visual Inc. Produce Film Dampui Forest ah hian Zira PC, Elza Tv te bakah acting lam a thiam tak tak te kan hmu nual a. Director hi Lalruatfela(Mart-a) niin Director of Photography hi Ṭhatea Ralte Videography a ni.
Dampui Forest hi Film danglam tak niin, Mizo film a kan hmuh zen zen loh Adventure horror lam hawi tur a ni a. Sports Department in Adventure Sport tih theihna hmun tur leh nature tourism tih hmasawnna lam hawi hmun (place) zawng tura adventure team a tirhna film a ni.
He filmah hian Mizo Adventure lam tuimite'n an thil tihnaa an thil tawn hlauhawm leh hmuhnawm tak tak kan hmu a. Mizoram hmun mawi leh rohlu a rawn pholang bawk a ni.
He film hi Ngentiang khua-ah chan niin, Ngentiang khuaa kham hmingthang leh puk-ah te an lut a, film an chan chhung hian a changtute hian tawnhriat an ngah hman hle.
He film ah hian Mizo tlangval chhuanawm leh huaisen Adventure leh Bushcraft lam min hmuh tir ṭhin tu Zira PC, Comedian ṭha chungchuang Parody music video nalh tak tak leh en hlawh tak siam thin Elza TV, Comedian Search Finalist Pachuau Lalenkawla, ZONET buatsaih Mizo Girls Group intihsiaka Finalist Lalnunhlui, hmeichhe Solo camper, Love of adventure Youtube channel neitu Apuii Bualte, Kenny Lianhna leh Main role play tu Emily Fanai te kan hmu a ni.
He filmah hian Ṭhatea Ralte Videography chu Director of Photography a ni a, kum 2017 film chhuak 'Detective Mart' Director Lalruatfela'n a direct a ni.
Mizo film dangdai tak, 'Dampui Forest' hi Runmawi Apps ah en theihin a awm a ni.
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: