Manipur Raltlante hnenah rilru lam inbuatsaihna hun hman a ni

Aizawl July 5, 2023: Health Minister, Dr. R. Lalthangliana ruahmanna leh ngenna angin vawiin Ni 5.7.2023 chawhnu dar 3:00 khan COVID-19 Psychological & Social Guidance Committee, Govt. of Mizoram te chuan Central YMA buatsaih Manipur raltlan Transit Camp, Tuikhuahtlanga Central YMA Hall-ah tunhnaia Manipur buaina avanga Mizo hnahthlak an sahimna zawnga rawn raltlante hnenah rilru lama an harsatna sutkian a nih theih nan leh an khawsak zelna tura rilru lam buatsaihna hun an hmang.

Manipur raltlante puala Psychological & Social Guidance hun hmanah hian an convener Prof. Zokaitluangi leh member engemawzat ten hun an hmang a. Central YMA atangin Asst. Secy. Prof. Malsawmliana hovin an lo dawngsawng a ni. Kan unau ten an tawrhna nasa tak chu Pathian thu atanga an dawn sawn dan tur leh mihring mihrinna atanga an hmachhawn dan turte hrilh hriat an ni.

COVID-19 Psychological & Social Guidance Committee te hian Manipur Raltlan te awmna refugee camp hmun hrang hrang a mi tlawhkual zel turin ruahmanna siam a ni.