Manipur Raltlan zinga mi boral, Central YMA ten ruang thawn liam

Aizawl | July 10, 2023: Tukin zing dar 6:00 vel khan Sihphir Kawn venga an hmelhriatte bela khawsa mek, Manipur atanga sa himna leh eizawnna zawnga rawn raltlan Pu Lammuanthang, Kum 39, h/o Nemngaihlian, Kum - 37, Kanan Veng Lamka, Churachandpur District , Manipur lam mi chu Electric Current in man palhin a boral a. Central YMA in a ruang la a, thil tul zawng zawng buaipuiin, vawiin vek chawhma dar 11:30 khan an khaw lamah a ruang thawn liam a ni.

Vanduaina tawk, Pu Lammuanthang te chhungkua hian June thla tir lam khan an sa himna ngaihtuah leh eizawn tumin Mizoram an rawn lut a, Khawdungseiah thla khat vel awm phawtin, kar hmasa kar tir lam khan an hmelhriat raltlana Mizoram lo lut ve tho, Sihphir lama mi in luaha khawsa Pi Chingthianmuang te rawn belin Sihphir ah hian an rawn lut ve rawih a ni. Tukin zing khan Sihphir Kawnvenga mi In luah tur an hmuh chu a chung rangva pawp thawm tha turin inchungah a lawn a, Electric Current hrui lian a lo hnai si a, mita hmutu awm lovin vanduaina hi a thleng ta a ni.

Inchung atanga a rawn tlak thlak hian thenawm khawveng leh khawtlang hruaitute inpun khawmin bawihsawm vât a ni a, damdawiin lam pan pui nghal niin kalkawngah mihring a chang zo ta lo a ni.

Sihphir Branch YMA in kuang siam sakin an thlah a. A ruang thawn haw turin senso leh buaipui ngai thil a awm avangin Central YMA in a ruang la thlain, hunserhte hmanpui a ni a. Central YMA morque Van-in Tuivai lei thleng dah a ni ang a, heta tang hian Manipur Group YMA ten lo hmuakin an khua pan pui leh a ni ang.

Pu Lammuanthanga ruang hi Khawpui chhung Branch YMA engemaw zat ten puana tuamin an thlah liam a ni.