HUN HARSAAH, KRISTA VUAN TLAT RAWH

  _I kaltlang mek paltlang dan tur_

— Rick Warren

— July 4, 2023

“Kan chhuan chu hei hi a ni, kan chhia leh tha hriatna thu hriattir chu, thianghlimna leh Pathian dikna neiin, tisa finnaah ni lovin, Pathian khawngaihna zawkin khawvelah hian kan chet kha, nangmahni lamah kan che tha lehzual a.” 2 Korinth 1:12

Hringnunah harsatna han tawh tak tak hi chuan, engtia awm tur nge tih hi hriat a harsa ṭhin a ni. Mahse thil pakhat danglam ngai lo leh rintlak reng a awm a: Pathian danglam ngailo nungchang hi a ni.

I hmaah chuan engpawh lo thleng se, Pathian khawngaihna chu a pangngai reng a. I hriat loh lai pawhin i tan engtiklai pawhin a awm reng a ni.

Bible in 2 Korinth 1:12 ah, “Kan chhuan chu hei hi a ni, kan chhia leh tha hriatna thu hriattir chu, thianghlimna leh Pathian dikna neiin, tisa finnaah ni lovin, Pathian khawngaihna zawkin khawvelah hian kan chet kha, nangmahni lamah kan che tha lehzual a,” a ti.

I hmaa thil thleng apiang chu Pathian khawngaihna hnuaia inrintawkna leh harsatna ata chu rinna neiin engtin nge i talchhuah theih ang? Kawng thum lo en ila:

*Krista lungpuiah chuan innghat rawh.* Bible chuan, “Engtikah mah a nghing dawn si lo va; Mi fel chu kumkhuaa hriat rengin a awm ang. Chanchin tha lo takte a hlau lo vang: LALPA ringin a thinlung chu a nghet a ni,” a ti. (Sam 112:6-7).

*Panlam tur i hriattheih nan Krista en rawh.* Hmalam hun ṭha takah a hruai fo vang che: “‘Nangni lama ka rilru putzia chu ka inhre si a, in hun hnuhnung tawpah chuan beiseina pe tûr che uin thil tha lo ni lovin thatna ka ngaihtuah asin.’” (Jeremia 29:11).

*Chhandamna chang turin Krista en rawh.* Buaina i tawh apiangin Isuan a ṭanpui ang che tih Bible in min tiam a. "Pathian chu kan inhumhimhna leh kan chakna, mangan laia tanpui vartu hnai reng a ni. Chuvangin leilung hi lo danglamin, tlangte hi tuifinriat chhûng daihah insawn mah sela kan hlau lo vang” (Sam 46:1-2).

Hun khirh tak kan paltlang lai hian i hnen lak ata an laksawn miah theihloh tur hnena i insawnna hun remchang a lo inhawng a: Pathian leh a nungchang danglam ngailo hnenah a ni. I in leh lo, eizawnna, kawppui emaw hriselna te hi i hloh thei a, mahse Pathian nena in inkar erawh hi chu i hloh thei lo vang. 

Raymond Edman, Billy Graham-a thurawn petu ber chuan, heti hian a sawi, “Pathianin enga a hrilh che chu thimah lo ringhlel suh,” a ti.

Heng hi chatuanin thudik anni a: Pathian hi a ṭha, a hmangaih che, i hnenah a awm reng, i paltlang mek a hria a, a ngaihsak che a, i nun atan ruahmanna ṭha tak a nei a ni. A kalsan emaw a ensan ngai lovang che. Chu chu chatuana i himna tur i neih theihna a ni.  

Ngaihtuah zui atan

* I nunah hun tha a inherchhuah lai khan, Pathian leh a hmangaihna che chungchangah eng nge zirchhuah i neih?

* Chung thudikte chuan harsatna i paltlang laiin engtin nge an puih che?

 * Pathian rinawmna i ringhlel anih chuan, Pathian Thu a thutiam zingah eng chuan nge fuihthar thei che?

*Vawiin hian Pathian thutiam chu i awih ang em?*

Bible chuan, “Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan” a ti. (Johana 3:16).

Pathian thutiam chatuana nunna chu chang turin i inpeih em? I inpeih anih chuan, hetiang hian ṭawngṭai rawh le:

“Lalpa duh tak, misual ka ni tih ka inhria a, chuvang chuan i ngaihdamna ka dil a che. Isua Krista hi i Fapa a ni tih ka ring a. Ka sualna avangin a thi a, thihna hnehin i kai tho leh a ni tih ka hria e. Vawiin aṭang hian ka chhandamtuah ka pawm ta che a, i hnung zui turin ka inpeih e. Ka nun hruai la, i duhzawng ti turin min pui ang che. Isua hmingin ka dil a che. Amen”

Isua vuan tura i ṭawngṭai thei a nih chuan, khawngaihin Rick@PastorRick.com ah hian email min lo thawn la. Isua nena zinkawng i zawhṭanna atana pawimawh te a thlawnin ka lo thawn ang che.

*[Lettu: Sangpuia]*