Central YMA-in Manipur buaina vanga hliam buaipui

Aizawl |July 17, 2023: July Ni 7, 2023 a Kangvai, Churachanpur District, Manipur-a Mizohnahthlak leh Meitei-te inkahna a hliam tuar Nehtinsat Haokip s/o Kanmang Haokip kum 21, New Zalenphai a mi chu vawiin Ni 17 July, 2023 khan Central YMA te ruahmanna in NEIGRIHMS, Shillong thlenpui niin Shillong Group YMA ten a tul apiang an lo buaipui chhawnzawm dawn.

July Ni 7, 2023 a Kangvaia in kahnaah hian Kangvai atanga Km 1 lek a hla a awm, Zalenphai khaw mipa ho chu Kangvaia Zohnahthlakte pui turin an kal a. Hetah hian Nehtinsat Haokip pawh hi silai leh hmanrua engmah keng lova kal ve in, inkahna hmun an thlen hian silaimu leng karah leiah bawkkhupa a awm laiin Meitei ho silai mu hi a dâr vei lamah lutin hliam a tuar a. Lamka Hospital lamah enkawl niin x-ray a lan dan chuan a taksa hmun thum, a dâr veilam, a awm bawrah leh a chuap veilam sirahte silaimu hi a tang a. Engemaw chen enkawl a, refer theih a nih ve leh Indigenous Tribals Leader Forum (ITLF) hruaituten Central YMA hnenah tanpui dilna lehkha thawnin kar hmasa lam Ni 13.7.2023 (Thu) khan Aizawl rawn phurh thlen a ni.

Aizawl rawn thlenpui a nih ve leh Central YMA hruaituten lo dawng sawngin Aizawl Civil Hospital-ah enkawl zui a ni a. Doctor ten hmunpui lam panpui vat tura thu rawn an pek angin NEIGRIHMS lam hi pan pui a ni ta a ni.

Central YMA chuan vanduaina tawk Nehtinsat Haokip leh a patea, Nehlen Haokip te chu thlawhna ticket laksakin pawisa fai ₹30,000/- an pai a, a tul anga inenkawlna senso pawh la ngaihtuahsak nise an ti bawk a ni.

Pu Ricky Zobiakvela, President Shillong Group YMA hnen atanga thu dawn danin Nehtinsat Haokip leh amah kalpuitute chu Umroi Airport-ah YMA Ambulance nena lo hmuakin Hospital pan tlang pui nghal an nih thu leh theih tawpa an lo buaipui tur thu an sawi bawk a ni.