%20(2).jpeg)
A hming chu Rambo a ni a. Rambo polythene chanchin kan sawi dawn lova, US Army, Green Baret val John Rambo zawk a ni kan sawi dawn ni. Rothap, rorum, ralrel thiam eltiang, sap sipai, mahni a ram lian leh sipai tam tak tukdawl a, hnehna hla do vawi tam chham fo, a tlachawp nun hmang tur ringawta an kal tir thin, a pu in John tia a koh, John Rambo ngei mai hi a phutawk ang aia ngaihsak a hlawhloh zia hi kan vuipui dawn a ni.
Ni e, "Ngaihsak Hlawhlo Rambo" hi 2020 May thla vel atang khan ziah kan lo tum tawh a, mahse Ngaihsak Hlawhlo Rambo ziah tum a, Rambo ngaihsak tur ber pawh hian ka va ngaihsak lo rei em. Hrilengah ka pakai san a, hri hlir hri hlir a ni chho a. Rambo erawh rilruah a awm reng thung. Movie lamah a ropuizia kan thlir a, a pa a, a rum a, amah in a rintlak tawk a, amah tawp hi sipai rual a ni a. Mahse, a phu angin chawimawi leh ngaihsak a hlawh silo lai hi kan thlir kan hlawm maithei.
Vietnam War ah US sipai engemaw zat man an ni a, hengho chhanchhuak tur hian Rambo lo chu US in rin a nei hlawllo a, tlin an awm heklo ang. An tirh duh ber Rambo lah Jail a tang daih mai si a, Vietnam a kal tur hian amah lo chu tlin an awm dawn silo. A pu Samuel Trautman bawk chuan a va sawm chhuak a, Rambo hi hel viau mahse a Pu Trautman-a, tawngkam thiam eltiang, Rambo rilru sak tak hneh theitu, a tawngkam thiam sawi uar nana tui tla pawh sawi chhuak thei hial awma an sawi hian a sawm chhuak leh ta nge nge a. An in putu ve hliah hliah a ni.
*Hmangaihna leh Phiarrukna*
Vietnam a han thleng chho a, a che rothap nghal viau dawn emaw tih laiin ngaihzawng a han nei te te phawt a. Chuan, a Vietnam kal chhan mi tang chhan chhuakin theihtawp a chhuah a, a hawpui ngei dawna a lan laiin hmunpui lam atangin phiarrukna tenawm tak hmangin chhanchhuaktu thlawhna kohkir a ni a, an man a, amaherawhchu a ngaihzawngin a rawn tanpui a, mi tang a chhanchhuak leh ta tho a. A hmangaih a ngaihzawng, film pumpuia a hmangaih awmchhun erawh kahhlum sak a ni a, a vanduai hle. A thi mai chu a chantawk a ni ta a, a khawngaih thlak tak zet.
Theihtawp chhuahin zum leh hriam karah Vietnam ramah a tih tur a hlen a, chawimawi a phu em em laiin a tlachawp a nung turin an kaltir tawp a, an ngaihsak thlawt lo a ni. Ram tha leh in ropui tak a phu em em laiin motor tlan lai te phar in chuan a dil ang duk duk a. An ngaihsak lo tak zet a ni.
Vietnam lamah hnehna ropui tak a chan hnu in Alaska khawvawt takah a thianpa a zawng a, he film First Blood ah pawh hian ropui taka langa bultan lo in kopang chhak lam kawng tum zim te atangin puak rit tak phur in ke in a rawn kal leh ang nelh nelh a. A mizawn lah an lo la pem tawh zui a. A tei a tei hnuah a chemte ken vangin Alaska khawvawt hnuaiah Police in an um a, misualdumber ngaiha ngaiin an bei a, mi pakhat lek kha battalion in an bei a, mahse an hneh lo, Green Baret val, mahni a Vietnam sipai tam tak hneh thei Rambo a ni tlat.
*Afghan lamah*
Soviet Afghan war a thleng a, Afghanistan a mi rethei ho in Soviet hmalakna vangin an tuar em em a, gas leh chemical Soviet in a buaipui hi Afghan thingtlang miin an duh lova, hemi beilet tur hian US in Rambo tirh a duh ta a. Rambo erawh a reh vung vung mai si. Colonel Trautman ho in an zawng a, sipai rothap, amah tawp hi nuamsa taka chawm tawp phu em em kha Thailand ah insualin a lo inhlawh daih mai a lo nia, a changin Buddhist ho sakhaw biak in chung chihin a inhlawh bawk a. Ropui taka US tihmingtha tu hi a inhlawhfa tlat zel. An ngaihsak meuh lo zawng a ni e. An han thlem chhuak zo ta lo, tlachawp nun hman leh sipai nunchan a in hen lo te pawh a ti a ni chek ang. Colonel Trautman chu Afghanah a kal te nge nge a, an lo man ta ngei. Thailand ah bawk Rambo chu thlem leh a ni a, a pu Trautman Afghanistan ah chhanchhuah a ngaih avangin a kal lo thei ta lo. Afghanistan ah pawh chuan hnehna ropui takin a chang a. A ngaihzawng leh a hmangaih neihchhun lak atanga a rochun awmchhun thi erawh Afghan naupang a pe daih a, hengte tal hi chu han kawl hlen tir ve awm hi a nia. Hetah pawh hian a tlachawp a nun hmang tur bawkin an kaltir leh a. A phu ang hian ropui tak hian an chawimawilo tak zet.
*Myanmar lam ve thung*
Myanmar ah pawh hian lawngpu angin a rawn lang leh hlawl a, rul te, sangha man te in engtin tin emaw eizawnna a lo indapchawp leh tak meuh meuh a. A sulhnu en hian Las Vegas velah nuamsa taka khawsa tur hi chu a ni chiang si a, a tlachawp a nung turin an kaltir zel mai bawk si. Chutah, Missionary kidnap te chhanchhuah an ngai leh ta sia, lawng hmangtu mipa ho in an han thlem a, an thlem thlu mai lo. Chinchang a hre si, thawhpui an duh si. An thawhpui thei silo. A nek nemna tak te pawh aniang hmeichhia in a han thlem a, tanpui a duh ta roh a. Rothap viau e tilo hian soprano aw chu a hnial hauh biklo tawp mai. Ralrel a thiam a, a tanpui a, an tum ber Missionary te pawh a chhanchhuah pui ta thlap a. A awmdan tur an han zawt leh a, a ngai ang bawka awm a thlang leh tho a.
*Vuipuina*
Hmangaih pakhat a nei a, hmangaihna par tlan a rei pawh an inngaihzawn hma in kahhlum sak a ni.
Ram zau tak neiin, huan leh in ropui tak neih phu em em hi a tlachawp a nung turin an liamtir leh thin a, a inhlawhfa thul. An ngaihsak lo ve chiang a ni.
Rambo Part 10 te phei chu siam se, tlachawp nun pawh hi a sawipeih tawh lovang, "Aw ral mai rawh lei ninawm", te pawh a ti hial ta ve ang.
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: