MZP Inter HSS Volleyball Tournament 2023 a tawp khar ta; KM HSS leh Khawzawl HSS te champion!

Aizawl | June 22, 2023: Vawiin June 22, 2023 khan MZP Inter Higher Secondary School Volleyball Tournament 2023 chu Aizawl West Joint YMA Multipurpose Hall-ah final khelh a ni a. School Education Minister Pu Lalchhandama Ralte chuan khuallian niin a hmanpui.

MZP President Pu Lalnunmawia Pautu chuan kharna hunah hian thu sawiin, "Mizo zirlaite hi kan hnamah kan chiang tur a ni a, hnamdang nupui pasal nei lo turin ka ngen nawn che u a ni. Kan ram leh hnam a him zel theih nan Mizo hmeichhia ten hnamdang fa min hrinsak lul suh u" tiin kalkhawm zirlaite a fuih a. Mizo mipate pawh nupui fanau chawm zo turin ṭan inla thar ang u a ti bawk.

Pu Lalchhandama Ralte School Education Minister chuan, MZP in zirlaite talent haichhuah nan leh an thiamna (skill) phochhuahna hun tha a siam sak chu zirlaite vannei a tih thu a sawi a. "New Education Policy (NEP) 2020 kan hmang tan mek a, hei hian infiamna (sports) a rawn ngaipawimawh thar hle a. Tunhmaa CCA a ngaih thin kha, tunah chuan zirna chhungah a rawn khung tawh a ni" a ti a. "Tun sawrkar kalmek pawh hian infiamna hlutzia hriain leh infiamna chu eizawnna tling a ni zia hriaiin Industry-ah a puang tawh a, nasa taka tih hmasawn tum mek a ni" a ti.

Khuallian chuan, Zirlai kalkhawmte chu mihring kan nih dan tur ang min nih tir lotu, ruihhlo leh zuk leh hmuam kala fihlim turin a chah bawk.

MZP Inter Higher Secondary School Volleyball Tournament 2023 result chu hetiang hi a ni;

Mipa:

1na- K.M HSS

2na- Central HSS

3na- Govt. Mamawii HSS

Hmeichhia:

1na - Khawzawl HSS

2na - J.L HSS

3na - St. Joseph HSS

Best Spiker: Mipa - H Malsawmsanga (KMHSS), Hmeichhia - Chinglunkimi (JLHSS)

Best Setter: Mipa - Lalchhanhima (KMHSS), Hmeichhia- Lalthakimi (Khawzawl HSS)

MZP Inter Higher Secondary School Volleyball Tournament 2023-ah hian Aizawl khawpui chhung atangin sikul 11; Govt Central HSS, St. Joseph HSS, Govt KM HSS, St. Pauls HSS, JL HSS, Greenland HSS, Oxford HSS, Staines Memorial School, Marcus School of Education, Govt Mamawii HSS, Springfield HSS bakah Aizawl khawpui pawn atangin Khawbung HSS, Khawzawl HSS, Lungdai HSS, Sesawng HSS, Tlungvel HSS, leh Thingsulthliah HSS te an tel a ni.

Springfield HSS hian Mipa team an nei lova, Govt Central HSS College Veng, Staines Memorial School Chanmari, Marcus School of Education, Govt Mamawii HSS Mission Veng leh Lungdai HSS Lungdai te'n hmeichhe team an nei lo thung.