Minister Ruatkima'n Remna Ni 2023 pual thlalak phochhuahna hawng

Aizawl | June 29, 2023: Remna ni champha vawi-37na puala Information & Public Relations Department, Mizoram Journalist Association (MJA) leh Mizo Photographer’s Society (MPS) buatsaih photo exhibition Vanapa Hall-a neih chu vawiin khan I & PR Minister Pu Lalruatkima’n a hawng.

Photo exhibition hawnna inkhawmah hian Minister Pu Lalruatkima chuan Remna Ni puala photo exhibition buatsaih a ni chu lawmawm a tih thu a sawi a. Mizoram chu kum tam tak a buai hnu ah June ni 30, 1986 khan sawrkar laipui leh hnam pasalthate zarah remna thuthlung ziah a nih tak thu tarlangin remna leh muanna nghahlelh em em chu neih a ni ta a ni, a ti. Kum 20 chuang rambuai ni thin kha remna leh muanna vawnghim tha ber a ni ta chu mipuite zar a ni, a ti a. Sawrkarin mawhphurna keng mahse mipui thawhpuina tel lo chuan remna tluantling neih theih a nih loh thu a sawi.

Pu Lalruatkima chuan remna leh muanna hlutzia sawiin khawvel huapa sulsutu tur UNO hial din a ni, a ti a. Hnam hrang hrang ten dam khawchhuak tur leh thiltihtheihna inchuhin an indo in an in nekchep thin a, thlamuang taka awm harsa an tih laiin Mizoram erawh ‘ram ralmuang ber’ (most peaceful state) a ni tiin lawmawm a tih thu a sawi. Mizoram thenawmte bakah ram đangahte remna a awm loh avangin nunna leh in leh lo tam tak an chan a ni a ti a, remna leh muanna an neih thuai chu a tawngtaina leh duhsakna a nih thu a tarlang bawk. Zofate Jerusalema sahimna zawnga lo lut te tuamhlawm chu sawrkar, kohhran leh tlawmngai pawl hrang hrang te tih tur dik tak a nih thu a sawi.

Minister chuan Remna ni pualin kuminah lawmna chi hrang hrang buatsaih a nih thu tarlangin hnam tin te inpumkhatna leh inlungrualna thlen tu ni se a duh thu a sawi a. Mimal, chhungkua leh khawtlanga inrem lo leh inrem theilote tan remna dar vuakna ni ah hmang theuh turin kalkhawmte leh Zoram mipuite a ngen a ni.

Thlalak pawimawhna sawiin Pu Lalruatkima chuan hnam rohlu leh tihdanphungte vawnghimtu hlu tak a ni a ti a, hmanlai thil hlu tak tak te phochhuaka chhawmnung zel tu a ni, a ti. Thangthar zel tur te tan Mizo ziarang leh nihphung vawnthat a ngai hle tiin hnam tipumkhata hmasawnna thlentu ani tih hre reng turin kalkhawmte a chah a. Mizo nunphunga bet nghet tlat ram vah leh sava veh te chu tunlai thangtharte chuan environment tan a pawi tih hriain thlalakna (camera) nen ram an vak tawh zawk a ni a ti a, thilsiamte nen lungrual taka cheng ho tur kan ni tih hre reng a,inrem taka nung ho turin kalkhawmte a chah bawk a ni.

Vawiin hawnna inkhawm hi I & PR Director Pu C. Lalnunkima chuan a kaihruai a, I & PR Secretary Pi HM Hualsangi pawhin thusawina hun a hmang bawk a ni.