I MUT A TUI EM?



NEHU-a MA kan zir laiin kan hlimpui deuh ṭhin, fiam hlawh ve tak Pu Johny-a a awm a, ani khan thu fing deuh a sawi chu, "AM reng reng a ṭha lo, PM-ah mut hman hram tur," tih a ni. Zanlai a pelh hmaa mut tur a tihna a ni. 


NEHU Campus-a zirlaite kha kan meng rei ṭhin lah tak a, lehkha zir vang ni teh meuh mah se kan inkawm nasa ve bawk a- zing dar 2 velah kan la tei suau suau kha a ni ber.

Lehkha kan zir zo a, hna kan thawk ve ṭan a, hnathawhna lamin a lo zir/zir lo bawk nen, zan men rei ngai chiin ka awm leh a, internet kan ban phak ve chiah bawk nen kan meng rei ṭhin hle.

Meng rei e ti lo chuan zing lama mahni veng football team kan enkawl chhoh ve ṭan bawk avangin thawh hma a ngai a, Mizoram team kan han enkawl leh tak tak phei chu a kuma kum kha zingkar zawng hi khelmualah ka hmang - thil danga punctual hleithei lo hi football team enkawl chuan ka tlai ngai lo, player ka thlen khalh ṭhin.

Hetihlai vêl hian darkar 5 vel ka mu tlangpuiin ka ring a, ka tlangval lai a ni 😊.
Tunlai hian ṭul avang te, ṭul lem loa men rei hrim hrim avangte, keimah ngei pawhin ka zirtir ve ṭhin zawm harsa ka tih social media vangte pawh hi a ni ang - ka mu tlem leh ta hle a, darkar 6 mut tlin loh ka ngah hle. Thil zawngchhangtlak tak a ni lem lo.

Ka han en kual vêl a, mi hlawhtling tak tak zingah Oprah Winfrey-te chu darkar 8 zet an lo mu ṭhin a, Albert Einstein phei kha chu darkar 10 a mu tling an ti!
Hetihlai hian Shahrukh Khan erawh darkar 4 vêl chauh a mu a, zing dar 4 velah a tho ṭhin an ti. Donald Trump hi darkar 3 vel a mu a, zing dar 1-ah muin dár 4-ah a tho leh mai ṭhin an ti!! Elon Musk hi dar 1 vela mu, dar 7-a tho ṭhin, darkar 6 vel mu ṭhina sawi a ni a, a inang lo thluah mai.

Mak deuh mai chu Cristiano Ronaldo hi ni khatah ṭum nga vêl muhil ṭhina sawi a ni a, darkar khat aia rei hrette a mu ṭhin. Ziaka a lan dan chuan minute 90 vêl a mu ṭhin a, a insawizawi zawhah a inbuala a mu hahchawl leh ṭhin an ti!

Brig Ṭhenphunga bawk kha sawi leh ṭhin ila - darkar 4-5 a mu a, darkar 18-19 hna a thawk ṭhin tih amah ngeiin a lehkhabuah a ziak. A mut lai, a châw ei lai leh a inbual lai a nih loh chuan Mizoram tán hna a thawh ṭhin thu a sawi.

Darkar engzât nge i mut ṭhin le?



Share it with your friends!
 

[Subscribe telegram channel for updates- https://t.me/exploremizoramchannel ]

(Feedback at: admin@exploremizoram.com )

Post a Comment

He post chungchanga i ngaihdan lo sawi ve rawh:

Previous Post Next Post