Zodini chuan thing hlim lam pan chuan a fanu duhtak, hlim em em a phengphehlep um kuala țe chul chu a phei san a. A țhut fel hnu lawkah chuan a fanu Rinpui te reuh pawh chu a nu lam pan chuan pangpar nen a rawn tlan phei ve nghal chawn chawn a. A nu chu ko leuh leuh chungin pangpar chu a rawn pe ta reuh a.. Zodini chuan mittui luang ngiai ngiai chungin, lawm em emin pangparchu a lo la a.. A fanu chu pawmin a chhipah duat tih hriat tak hian a fawh sak zeuh a..
*********************************
Zodini chu rilru na tih hriat takin ngawi rengin lehlam a hawi a, a mittui chu dan rual lohin a dir ta zawih zawih a. Mak hi a ti a, a ring pha ngai lo. Nupa nih hma a nupa nun hman hi a dik a ti a ni bik lo. Mahse Muana hi a hmangaih em avang leh Muana pawn hmangaih ve tak tak nia a lo hriat vangin ngaihtuah chiang lovin a engkim a lo hlan a. A fa a pai ta chenga, a ma mimal hmingțhatna humhim tur maia chu a pum chhunga nausen pawisawi lo, a ma thisen ațang ngeia lo insiam chu titla tura Muanan a kar ta tlat mai chu a hrethiam thei lul lo.. A pa ngeiin a fa thah a tum mek chu a ni si..
Muana hi chhungkaw pangngai tak ațanga chawr chhuak a nih vangin a lo ring țhin a. Mahse chhungkaw pangngai tak ațanga mi pangngai tak anga lang thei tura a thil tih duh dan chuan chung rinna zawng zawng chu vawi lehkhatah a thai chhe vek a.. Muana chuan amah leh a fa ngei ai pawhin ama zahawmna humhim a duh zawk danah chuan a lo hmangaih tak tak lohzia chu a chiang reng.. Hmangaih tak tak nise chu an kara nausen lo insiam mek vang chuan a hlim ang a, inneih dan kawng a dap vat ngei ang, Zodini zahawmna humhim tur talin.. Mahse a thin tirimtu mai a lo ni si. A titla lo a nih chuan an inkar pawh tihtawpah a la vo zui! Mi țhenkhatin hmangaihna hmel kan tihbalh duhdan hi chu a mak teh emaw..
Zodini pawh hian zep lohah chuan Muanan a rawn hel tirh khan mak a ti sa tawh hrim hrim.. Zodini hi hmel chhe lo tak a nih avangin ngaihzawng a lo nei ve nual tawh a, ngaihzawng a nei hma ve deuh bawk nen lerh thanin a thang a. Amah hrechiang uk lo hian miin an en tleu țan mek a.. Mahse a nihna takah chuan hmeichhia chuan hnemtu leh innghahna tlak mipa an duh vek a, chutiang mi ni lo nia an hriat te bulah chuan an nun an hlan phal mai bik lo tih reng an chhutpui lo.. Zodini ngei pawh hi chutiang mi chu a ni. Mipa in a hel ngai map lovin zartu neuh neuh a nei reng a, hmeichhe awm nem leh rilru no nafam chuan lo duh hun an lo nei leh mai țhin.. Mahse a rei a, amah ni lovin a sakruang mawina chiah an thlahlel a ni tih a hriatchhuah rualin a thlah hmak zel a.. Ngaihzawng ka nei tawh lovang ti fo țhin mahse a rilru țhatna vang hian amah heltu, beidawng duh miah lo te chu khawngaihin a nihpui leh nge nge țhin.. A pawi ta ber erawh a hma a mi ang tho an lo ni leh țhin hi..
Mahse chuti khawp chuan ngaihzawng chu nei ve nual tawh mahse a thianghlimna chu a pasal hnenah chauh hlan tumin a inveng tlat a ni tih reng tun an chhut lo. An nawhchizuar sawi lo chauh hi a ni ber a. An dinhmunin zir deuh chu ni tal se a heti bik kher lo tur.. Hmeithai fanu a kara sachek zuar mai mai an nihna hian a zahawmna humhimna kawngah kori a tu lo khawp mai.. Muana hi tawng lo ni phei se lang chuan la thianghlim reng tur hi a ni a, mahse a rin awm chhun Muana pawh a rin ang a lo ni leh si lo.. Chu chuan a thil tihsualzia chu a hriat chhuah tira, chu a thiltih sual thup tura a aia rapthlak zawk sual khawih chu a ngam ngang lo.. Pathian țih tak tia sawi tur ni lo mahse a mihring mihrinna bakah a Kristianna ngei pawh chuan a remti thei lul lo..
Chutiang khawpa khawtlanga a hming a hliau hnu chuan Muana hi a nunah a rawn lang a. Khawtlangah pawh chhungkaw zahkai pha an nih piah lamah amah Muana ngei pawh Kohhran leh khawtlanga a kul a taia țang țhin a lo ni leh zel nen.. Zodini tan chuan rin loh theih loh a lo ni ve bawk a ni.. Mahse tunah chuan a chiang tawh, pasal an nih hma loh chu mipa hi lo rin mai mai loh tur tih hi.. Mahse a tlai zo tawh bawk si..
Zodini chu insum hram hramin, hawi pawh hawi let lem lovin, "U Muan, chutiang chu i duhdan a nih si chuan a țha e.. Kan inkar thu chu a tawp e.." tiin muangchangin Muana chu a kalsan ta a. Min a țap a ni tih an lo hriat hlauin kal pah chuan a inhru sawk sawk bawk a..
*********************************
Hun a kal duak duak a, a pa pawh sawi duh lova a nau pawm vang chuan Zodini dinhmun chuan a hma ai zawngin en tleu a hlawh leh zual a. Khawtlangin an thinhrik hi a ni tawh deuh ber zawk.. Nuthlawi a nih vang maia zuam tawk leh cheksawlh duh tawk pawh a tawng ta malh malh mai.. Mahse chung vang mai mai chuan a fanu chu beidawn san a tum lo.. A tichak zual sauh sauh a ni..
A nihna takah chuan amah diriam ngawih ngawihtu te ai pawh hian a mihring mihrinna chu a mihring daih zawk a lo ni.. Hmangaihna thu ah nise a firin a dik zawk daih a sin! Mahse a nihna ang teh a ni lova, ngaihdan leh rindana buk a nih miau avangin a kang ta vaw vaw a, a tling zo lo a ni chauh zawk.. Rinpuii tan rinchhan tur pa awm lo mahse riangvai te pa Pathian an nei a.. A lan dan ni lovin thinlung takin an pa neihchhunah chuan an innghat tawp mai a ni..
Hun a kal zel ang a, Muana hian engtin nge a nun a hman zel ang? Dinpuii te nufa hian hmuhsit leh diriam an tuar reng ang em? Chuta țanga zawhna lo piang ta chu engah nge mi hi kan hmuh dana kan lo teh fo țhin!? Nuthlawi leh hmeithai an nih vang maiin engah nge mi dinhmun hi kan ngaihhniam ngawt țhin? Zawhna chhan sen loh zawh tur a awm ngei ang.. A pawimawh ber zawk erawh keinin engtin nge kan nun kan hman tih hi a ni.. Zodini țhenawm khawvengte anga "An dâwn chiang lo a ni.." min tih lohna turin fimkhur leh dik takin i nung phawt mai teh ang u.
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: