ZORO-in Hnam Inpumkhatna kawngzawh huaihawt; "Rorelna pakhat hnuaiah Zofate insuihkhawm leh turin chak takin hma kan la tlang zel ang"

Aizawl | May 27, 2023: ZORO chuan vawiin chawhma dar 11 khan 'Hnam Inpumkhatna kawngzawh' an buatsaih a, "rorelna pakhat hnuaiah Zofate insuihkhawm leh turin chak takin hma kan la tlang zel ang," an ti.

ZO Re-unification Organisation (ZORO) chuan vawiin chawhma khan Millennium Centre aṭanga Vanapa Hall thleng kawng an zawh a, Zofate inpumkhatna an duh thu an tlangaupui.

Kalkhawmte hian resolution pali an pass a;

1. Zofate; India, Burma leh Bangladesh awp chhunga chengte hi Hnam khat, thlahtu thuhmun, serh leh sang inkhawih pawlh, beiseina hrui khat vuana, 'Dam leh tlang khatah, thih leh ruam khatah,' ti thin unau dik tak kan ni.

2. Chin-Lushai Conference 1892, January 29, Calcutta, Fort William-a THUROLUM (Thutlûkna) No. 1-na angin rorelna pakhat hnuaiah Zofate insuihkhawm leh turin chak takin hma kan la tlang zel ang.

3. Ramri daidana leng Zofate'n kan lungkham ber Zofate insuihkhawm lehna hi kan pianpui chanvo a ni a, UNO-Declaration on the Rights of Indigenous Peoples, Article 3-na in min phalsak angin Zofate insuihkhawm leha rorelna pakhat hnuaia kan awm tur thu vawiin ni 27 May, 2023 hian kan puang a, hei hi a hlawhtlin theih nan tharum thawh lovin chak takin hma kan la zel ang.

4. Zofa hmun hrang hranga awmte kan insuihkhawm leh theih nan, kan awmna hmun apianga theihtawp chhuah theuh turin kan inngen a ni e.

- te hi a ni.

ZORO chuan nimin aṭang khan Vanapa Hall-ah Zofa Inkhawmpuilian an buatsaih a, Minister Lalruatkima chuan khuallian niin a hman pui.

Vawiin hian, kawng zawh zawh hian Chawhnu dar 1 aṭangin Vanapa Hall-ah vêk he inkhawmpui hi an chhunzawm dawn a ni.