ZAIDAMNAIN BUAINA A TIHKIAN DAN

  _Malsawmna Dawng Nun Rahbi_

— Rick Warren 

— May 5, 2023

“Chhanna nemin thinur a tikiang thin a, tawng huatthlala erawh chuan thinur a chawk tho thin.” Thufingte 15:1

Mihringte hian mi dang rilru puthmang hi kan lachhawng duh deuh tlat thin tih hi i ngaihtuah ngai em, a bikin kan kiang hnaia mite hi kan entawn duh zual. A chhan chu kan thluakah hian chutiang rilru chu mi dang khawngaihna leh mi dang entawnna a awm thin vang a ni.

Entirnan, i chungah mi an thinrim chuan, i thinrim let ve a. Mi tu emaw chu a lungngai hle a, chumi bula i awm tam chuan i lungngai ve thuai thin a ni.

Chutiang bawkin, miin an awki an san viau chuan nang pawhin i san ve zel a. An awki an san zel chuan, nang pawhin i san zual zel a. Boruak a sosang zel a, kan rilru kan thunun hman ta thin lo a ni.

Mahse Bible chuan heti hian min kawhhmuh daih a, “Chhanna nemin thinur a tikiang thin a, tawng huatthlala erawh chuan thinur a chawk tho thin.” Thufingte 15:1

In nupa chungchangah te, nu leh pa in nihnaah te, i thian chungah te leh hnathawhnaah innghirnghona leh buaina zakhua a thlen lohna turin thurawn ka lo pe ang che: Mi dangin an awki an san chuan, nang chuan i awki tihniam la. Chutianga i tih chuan i chakna i tilang a ni ang.

Bible-ah kan hmuh “zaidamna” hi Greek tawng chuan _prautes_ tih a ni a. Lehlin hmasa thenkhatah chuan prautes chu “zawldawh” tia lehlin a ni. “Zawldawh” tih chu chaklo tihna nen a inzul deuh avangin hman pawlh tur a ni chuang lo. Amaherawhchu zaidamna emaw prautes emaw chu chaklohna kawng khat chu a ni ngei e.

Dik tak chuan, prautes chu sakawr khawi ngam tiin a sawifiah theih a. A hlauhawm dan tur chu han ngaihtuah teh. Ramhnuaia i kal chuan sakawr hlauhawm chu i hmu ang a, an kawlh em ema, an hlauhawma, vawi lehkhatah an that thei mai ang che. Mahse chu sakawr chu i khawi ngam hnu chuan, a chakna chu la ngai reng mah se, a chakna chu thunun a ni tawh dawn a ni. Chu a chakna chu a pu thuhnuaiah a awm tawh dawn a ni. 

Zaidamna dik tak chu i zirchhuah hnuah chuan, i chaklo ta tihna a ni lova. I chakna chu Pathian thuhnuaiah a awm tawh a, ama tan i hmang tawh a ni.  

Ngaihtuah zui atan. 

* Miin an awki an san viau lai te, i fate an sual viau lai te emaw i kawppui emaw i thian tha te nen emaw nen in intihthiamlohin engtin nge i tih thin?

* Mi dang thinrimna aiia zaidamnaa hmachhawn hi engtin nge i ngaih? Engvangin nge mi rilru a hneh thin? 

* Tunkar chhung hian zaidam chu zir la. Zaidamna nena mi i hmachhawnin engtin nge an lo tih tehreng che? Zaidam tura i beih dan leh anmahnia nghawng a neihdan te sawiho ru le.

*[Lettu: Sangpuia]*