SERCHHIP HMUNA MIZO HMUNHLUI PAWIMAWH TEN ZORAM KHAWVEL A NGHAWRNGHING TA

- K. Remruatfela

Secretary

Serchhip Heritage Society

Vawiin, ni 5 May, 2023 (Fri) khan "Serchhip Heritage Society" bultumin Serchhip Khaw hluiah, kum 1871-a Mizo Pasaltha ten Alexandrpore thingpui huan an rum tuma, Mary Winchester (Zoluti) mana fa atana  rawn hawntu Pasaltha Chawma hriatrengna lung chu ama Inhmun hluiah ngei, Heritage Chairman, Pu Lalrinthuama Kawlni kaihhruainain Pu R. Lallianzuala, Mizo Writers Association President chuan a hawng a. He hunah hian Aizawl lam atangin Mizo History Assocation, Mizo Writers Association, Mizo Academy of Letters hruaitu engemaw zat bakah Pasaltha Chawma thlah kal zel te an rawn tel thei bawk a. Chumai bakah Pasaltha Chawma'n Alexandrapore an rum tuma a fei leh kâwlhnam ngeite a taka hmuh theih turin a tu te hian an rawn keng bawk a, chutiang chuan hun nuam leh hlawk tak kan hmang tlang a ni.

Pasaltha Chawma Lungphun hawn a nih zawh veleh hian Serchhip Khawhluia Pasaltha Chawma unaupa fa, a rokhawmtu ni bawk, Dolenga thlan tlawh a ni a. Chumi zawhah Mizo Lal ropui, Lallula leh Serchhip lal hmasa ber, Lalrumi inhmun te tlawh kual ni lehin Kawlri Tlang lamah chuan chhunzawm a ni a. Kan khual thate hi Mary Winchester (Zoluti) tual chaina hmun leh Kumpinu lungphun te tlawh kual pui  chhunzawm an ni. Serchhip hmuna Mizo hmun hlui pawimawhte tlawh kual a nih hnuah Bengkhuaia In hmum zawl, Kawlri Tlangah MUP Serchhip Vengchung Branch ten hmanlai Mizo In an sak chu hawnna hun hman leh a ni a. Serchhip Vengchung VCP, Pu B. Vanlalngura'n a hawng a ni.

MUP Mizo in sak hi hawn a nih zawh veleh Heritage Vice Chairman, Pu Kaptluanga Ralte kaihhruainain "Mizo Historian leh Serchhip Pa ten Mizo history chungchangah eng hi nge an lo hriat fuh loh?" tih paper Tv. K. Remruatfela ziah chu zir chhunzawm a ni a. Resource Person in Mizo history leh Serchhip inkungkaihna hrang hrangte chipchiar taka a sawi hnuah sawihona in a chhunzawm a. Tichuan, sawihona hun neih zawh a nih hnu dar 4:30 ah Bengkhuaia In hmun zawlah ngei Changel leh Mauthei hmang ngeiin ruai pui theh a ni a. Kan puar tlang hle turah kan inngai.

Pasaltha Chawma lungphun leh hman lai Mizo In sak nan hian sawrkar sum cheng khat mah hman a ni lova. Serchhip Heritage Society leh MUP Serchhip Vengchung Branch ten kan thawhkhawm liau liaua kan puitlin ve a ni a. Hetianga sawrkar ngheng lova Mizo hmun hlui pawimawh leh rohlute kan sualchhuak thei hi kan lawm tak zet a ni.

Share it with your friends!

 

[Subscribe telegram channel for updates- https://t.me/exploremizoramchannel ]

(Feedback at: admin@exploremizoram.com )

[For Ads - Contact +919402125273 ]

EXPLORE MIZORAM

https://www.exploremizoram.com

email: admin@exploremizoram.com

Telegram channel:

https://t.me/exploremizoramchannel

FB page: https://www.facebook.com/exploremizoramportal

FB Group: https://www.facebook.com/groups/exploremizoram

Twitter: https://twitter.com/exploremizoram

Instagram: https://www.instagram.com/explore.mizoram

Youtube Channel: https://www.youtube.com/channel/UCyNrX06aSZ26HkIB25eo1YQ