MZP Biate-in zirlai tiṭha chawimawi; "Sawrkar hna thawk kan ngaisang lutuk hi Mizo society kan kalsualna a ni."

Biate | May 29, 2023: Mizo Zirlai Pawl (MZP) Headquarters, Biate chuan vawiin May 29, 2023 chawhnu dar 1 khan Zialung Community Hall, Biate-ah Zirlai tiṭha chawimawina hun an buatsaih a, Khawzawl BDO Pu Lalṭhakima Chhangte chu khuallian niin, MZP General Headquarters, Aizawl Assistant General Secretary Pu Chinkhanmanga Thomte chu khualzahawm a ni bawk.

Khuallian Pu Lalṭhakima Chhangte chuan thu sawiin, "Mahni tumah chiana lehkha zir tur a ni. Tum mumal tak neiin, chumi tum chu tihlawhtling turin theihtawp chhuahin in zir tur a ni," a ti a.

"Sawrkar hna thawk kan ngaisang lutuk hi Mizo society kan kalsualna a ni." tiin, "Sawrkar hna thawh kher hi tum loh tur, eng tikah mah min daih dawn lo," a ti.

Pu Lalṭhakima Chhangte chuan, "In thluak, thiamna leh theihna te hi sumdawnna leh thil hrang hrangah kan mamawh a, sawrkar hna kher lo hi eizawnna a tam." a ti a.

"Vawiina zirlai tiṭha kan inchawimawina hi indahsanna tur a ni lova, hmalama nun in hmachhawnna zel atana chona ni rawh se! Mi aia hnufuala awm loh tur a ni." a ti bawk.

Khuallian chuan, Zirlai kalkhawmte chu, mahni tuma chianga chumi hlen tura theihtawp chhuah turin a chah a, nun tichhe thei ruihtheithil leh nulat tlangvalna lakah inthiarfihlim a, kohhran bel a, khawtlang tana mi lak tlak ni turin a chah.

"Lehkha thiam ringawt a tawk lova, engnge ka ram leh ka khua tan ka tih let theih tih hi inngaihtuah tur a ni. Hlawhtlinna hi keimahni tan chauh a ni lova, kan ram tan, kan mipuite tan a ni a. Mahni khua theihnghilh loh tur a ni," a ti bawk.

MZP General Headquarters, Assistant Secretary Pu Chinkhanmanga Thomte chuan, "MZP-in zirlai tiṭha chawimawi kan buatsaih ṭhin hian chhan a nei - in hlawhtlinna kan lawmpui che u rualin, in kova mawhphurhna sang tak a awm a, in lakah beiseina sang tak kan nei a. He chawimawina hi nangmah chotu nise - in thiam leh finna kan ram leh hnam tana hlan let leh ngei ngei turin kan beisei che u a ni," a ti a.

Pu Chinkhanmanga Thomte chuan, "kan khawhai kan tihzauh a ngai a, ram leh hnam tana mi ṭangkai ni turin theihtawp kan chhuah a ngai. Kan ram leh hnam hmasawnna hi ṭhalaite kutah a innghat a. Chumi hlen tur chuan ṭhalaite kan ṭan sauh sauh a ṭul." a ti bawk.

MZP AGS chuan, "Zirlaite chu HIV/AIDS laka fihlim turin a chah a, hnam dang nupui pasal nei lo turin a chah a. "MZP hian zirlaite leh ram leh hnam hmakhaw ngaiin Mizo zirlai pahnih UPSC coaching a sponsor mek a ni," a ti bawk.

Vawiin MZP Headquarters, Biate buatsaih Zirlai tiṭha chawimawi-ah hian zirlai 13 (Pawl 10 zirlai 5, leh Pawl 12 zirlai 8) te chawimawina hlan an ni a, vawiin hian distinction leh 1st Division chin an chawimawi a ni.

Zirlai tiṭha chawimawi hi MZP Headquarters Biate Vice President H Lalduhawma'n a kaihruai a, Biate VC aṭangin zirlaite fuihna thu ngaihthlak a ni bawk.