MSU-in Manipur Zofate kut thlaktute dem; Nunna chânte tawrhpui

Aizawl | May 4, 2023: Mizo Students’ Union (MSU), General Headquarters, Aizawl chuan, Manipur-a Zofate tawrhna thleng mek chu pawi a tiin, Zohnahthlakte laka kut thlaktute an dem tak zet a, he thil thleng avanga nunna chânte thinlung takin an tawrhpui tak zet, tih thuchhuah siamin an tarlang.

He thu hi nizan zanlai khan Emergency meeting neiin an ngaihtuah a, Mizote hi remna duh leh India rama ‘state ralmuang ber’ nihna dinhmun neitute kan ni a; khawi hmunah pawh cheng ila, Zofate hi ‘Symbol of Peace’ ti-a chhâl theih tur khawpa ṭhenawm khawvengte hmangaihtu hnam kan ni tih hi Khawvel hriatah an puang nawn leh.

MSU hi Zofa hnam hrang hrangte inzawm khawmin a din a ni a, Pawl puanzar hnuaiah hian Zofate zawng zawng kan tel vek a ni. Tun hnaia khawvel hmun hrang hranga Zofate tawrhnaah hian MSU chuan remna leh muanna a duh ber a, zanina Manipur State-a Zofate thihna thleng hial khawpa hnam anga min pâwngnêkna hi pawi a tiin thleng nawn tawh lo se a duh tak zet a ni. Manipur State-a hnam anga innekna leh Sakhaw Biak In thlenga suasamsak kan ni hi kan thinlung a na tak zet a, India Sawrkar kaihhruaina hnuaiah Mizoram leh Manipur State Chief Minister te a rang thei ang bera inbe turin kan ngen a, a ṭul dan anga palai hna thawh pawh kan inhuam a ni, tiin MSU thuchhuah chuan a tarlang.

MSU chuan Zofate chunga kut thlaktute lakah hian phuba lakna emaw hleilenna lam kan rilru a ni lova. Amaherawhchu, boruak kan thlir chhunzawm reng dawn a ni. Tun dinhmunah chuan Mizoram chhunga an chipuite pawh thlamuang taka awm turin kan chah a. Chutihrualin, kan chipuite pawh kut thlak chhunzawm tawh lo turin kan ngen nghal bawk a ni.

He buaina thleng mekah hian Manipur State sawrkar chuan thu lai la taka a rang thei ang bera remna leh muanna a awm theihna tura hma la nghal turin kan ngen a, Central Sawrkar pawhin he buainaah hian Central Para Military Force a tam thei ang ber dah turin Central Sawrkar chu MSU chuan a ngen a ni.

Share it with your friends!

 

[Subscribe telegram channel for updates- https://t.me/exploremizoramchannel ]

(Feedback at: admin@exploremizoram.com )

[For Ads - Contact +919402125273 ]

EXPLORE MIZORAM

https://www.exploremizoram.com

email: admin@exploremizoram.com

Telegram channel:

https://t.me/exploremizoramchannel

FB page: https://www.facebook.com/exploremizoramportal

FB Group: https://www.facebook.com/groups/exploremizoram

Twitter: https://twitter.com/exploremizoram

Instagram: https://www.instagram.com/explore.mizoram

Youtube Channel: https://www.youtube.com/channel/UCyNrX06aSZ26HkIB25eo1YQ

.

.