Mizoram MMA team fehchhuak an hlawhtling

Aizawl | May 22, 2022: 6th MMA India National Mixed Martial Arts Championship, Lucknow khawpuia May 18-21, 2023 chhunga khelh zawh takah Mizoram aiawha tura Mizoram State MMA Association (MISMA) tirha khel mi 8 te an che ṭha hle. He event-ah hian International MMA Federation dan angin Amateur MMA pangngai bakah, naupangte aṭanga development siam nan 17-21 years leh Youth A, B leh C (Kum 10-17 inkar) event a awm bawk. MMA cage pawh pathum lai hman a nih bakah Open mat (Tatami) pahnih hman tel a ni.

Senior Amateur tournament bikah hian National level-ah hian competition a sang tawh em em a, Fighter an ṭha-in hma an sawn nasa a ni. Natoial championship vawi 5 leh National Open Vawi 8 vel lo neih tawhah North Est mi zingah Gold medal la thei chu Zarmawia chiah hi a la awm a, tun ṭumah hian Mizoramin gold medal 3 leh silver medal 1 an rawn hawn a ni. MISMA President Jeremy L. Pautu chuan national kal tura nasa taka mahni naute training lo petu MISMA hnuaia club pahnih - SPES gym (Dawrpui Contact Sports) leh HBK Gym chungah lawmthu a sawi a, Sorkarin an kalna leh senso mamawh angte a tumsak avangin Chief Minister zahawm tak Pu Zoramthanga leh Sports Minister zahawm tak Pu Robert Romawia Royte te chungah lawmthu a sawi bawk.

Nazareth Lalṭhazuala s/o Lalhratthanga, Zemabawk Kananthar veng (Flyweight), Zarmawia s/o Lalramnghinglova, Chite Veng (Featherweight) leh David Lalmalsawma s/o Lalhriatpuia, Kulikawn (Lightweight) te chuan Gold medal an la a, Lalnunmawia s/o Lalthanzama, Aizawl Tlangnuam Venghthar chuan Silver medal a la bawk. Zarmawia leh Nazareth-a te hian best performance award (MMA glove) an dawng nghe nghe a ni. Chhatisgargh chuan gold medal 15 lain team champion an ni a, Maharashtra chuan medal MISMA Technical Chairman Samuel Lalrozama, Dawrpui chuan Mizo fighter ten hma an sawn tawh thu leh gold medallist te hi theih tawpa professional fighter ni ngei tura an pawl chuan hma an lakpui tur thu a sawi a, Zara leh Mawia te hi Muaythai background niin Nazareth leh David te hi Kickboxing background an ni thung a, an standing skill neih sa bakah theih tawpa ground game (Brazilian Jiu-jitsu) an zir rah an seng a ni, a ti. Fighter-te hi May ni 22-ah Lengpui airport–ah Aizawl an lo thleng ang.

Nazareth-a hi Round of 16-ah submission (Armbar)-in a chak a, Quarterfinal leh Semifinal-ah Technical Knockout in a chak leh a, Final-ah hian India rama ṭha ber, national-ah pawh vawi tam tak champion tawh leh Asian Championship-a bronze medalist ni lai, Tamil Nadu mi chu Unanimous Decision-in a hneh a ni.

Zarmawia hi a record a ṭhat vangin Round of 16 a bye a, Quarterfinal leh Semifinal chu Technical Knockout-in a chak leh a, Final-ah Fighter ṭha tak mai, Brazil-ah pawh lo training tawh, BJJ Purple belt Karnataka mi chu Unanimous Decision-in a hneh a ni. Tihian India ramah recod a siam a, Natoinal Championship-ah weight pathum - Welterweigt (-77 kgs), Lightweight (-70kgs) leh Featherweight (-65.8 kgs) ah a champion ni thei awm chhun a ni. Ani hi Bialtu MLA leh Sports minister ni bawk Pu Robert-a’n a Personal Training fee a tumsak mek.

National championship-ah hian weight khatah State khat aṭangin mi pahnih tel phal a ni a, David-a hi Round of 16 leh Quarterfinal-ah Technical Knockout-in a chak a, Semifinal-ah Knockout-in a chak leh. Pool lehlamah Mawia a awm ve thung a, Round of 16-ah Knockout-in a chak a, Quarterfinal-ah Submission (Armbar)-in a chak leh a, Semifinal-ah Technical Knockout-in a chak leh. Tichuan Final-ah an pahnihin an innuai ta a, inhnehtawk viauvin Split Decision-in David-a hi a chak ta a ni.