Manipur Zofate tawrhpui hun hmang

Aizawl | May 6, 2023: MNYF General Headquarters, Aizawl chuan vawiin chhun dar 12 aṭang khan Vanapa Hall kawtat Manipur Zofate tawrhna avangin an pungkhawm.

He huna thusawitu MNYF President L Thangmawia chuan, manipur zofate tan theihtawp chhuah mek a nih thu a sawi.

Naktuk khian sawrkar aṭangin Law Minister Pu TJ Lalnuntluanga chu Imphal a pan dawn niin thu dawn a ni a, MLA Pu L Thangmawia pawh a kal dawn nia thu dawn a ni. Anni bakah NGO lam pawh an kal dawn nia hriat a ni.

He hunah hian NGO aiawh hrang hrangin thu an sawi.

He hunah hian MZP General Headquarters, Aizawlin vehbur a khawn chu kalkhawmte zingah pawh hian khawn a ni.

Vawiin punkhawm resolution:

Manipur-a kan unaute thlavang hauhna inkhawm (Peaceful demonstration) May ni 6, 2023 (Inrinni) a neih chuan lungrual takin heng resolution te hi kan pawm.

1. Manipur-ah remna leh muanna a awm leh thuai a, mitinte thlamuang taka an awm leh thuai kan duh tak zet a. Remna leh muanna a awm theih nan Mizo mipuite sawrkar, Kohhran leh tlawmngai pawlte zai ngai hram hram turin kan ngen a ni.

2. Manipur tualchhung buaina hi a rang thei ang bera chinfel a nih theih nân chak taka hma la chhunzawm zel turin sawrkar laipui leh Manipur sawrkar kan phût a ni.

3. Manipur-a remna leh muanna a awm theihna tur leh kan mi leh sa leh zirlai tangkhangte ṭanpui tura Chief Minister Pu Zoramthanga hmalakna hi chhuanawm kan ti a, Manipur Sorkar pawhin tangkhangte la chhuak tura Mizoram sawrkar hmalâkna lo tikhawtlai lova lo pui nghal zel turin kan ngen a ni.

4. Manipur-a kan Zohnahthlâk unaute an harsatna tawh apianga ṭanpui zel turin an kiangah kan ding reng dawn a, he buaina avànga kan unau, sahimna zawnga Mizoram rawn pante hmangaihna nen lo kuangkuah turin Mizo mipui zawng zawngte kan ngen a ni.

5. Myanmar, Bangladesh leh Manipur-a kan chipui leh unaute harsatna tawh chhawmdawl tura tlawmngai pawl leh Kohhran, political party hrang hrangte ṭanrualna hi lawmawm kan ti a. Mizo mipui ṭanrualna hian Zofate inpumkhatna ṭha zawk a siam kan beisei tlat a ni.