(A ṭhiannu - Apuii of Lungsen kamchhuak tawite telin)
📒Remmuana Chawngthu✍️
Thuhma:_
Ka damkawr taksa la chak loh vangin thil thui tak ka la type ṭha hlei thei lo a. Tunlaia Manipur buaina chungchang te leh thil dangte pawh hre ve nil nial mah ila, thu pangngai han ziak vak turin ka la chak tawk lo deuh a ni ber. Tun ṭumah erawh, gospel singer ka ngainat em em zinga mi - Joseph Zaihmingthanga thih thu ka hriat rualin theihtawpa insangmar chungin, a sunna atan hei hi ka han thai lang hram ang e.
A thih thu ka hriat hian min ṭhawng na ve hle mai a, ka ui a, ka lainat a, a chhungte - a bikin a fate ka lainat hle bawk a ni. Lalpan thlamuanin awmpui mawlh rawh se.
An lar vung lai kha:
Mizoramah hmun tin deuhthaw-ah Kasauti film Mizo ṭawnga lehlin kan en uar vung lai leh kartin chanchinbu Lelte weekly kan ngaihhlut zual hunlai kha a ni ve a. Mizo mipuiin, Anurag leh Prerna kan khawngaih a, Komolika kan ngei rawn vung vanglai kha a ni awm e.
Pu C. Dinthanga chanchinbu LELTE WEEKLY-ah khan an chanchin chhiar tur a awm ngun viau zel bawk a. Local channelah an zai hmuh tur a awm leh zauh ṭhin a. Tun anga duh duha zai hmeh chhuah theih ang kha a ni lo a, chuti chunga an larzia kha pui tak a ni.
*_"Tahchuan a leng" mawlh kha:_*
A kut zungpir leh zungte tipirin a ban a'n phar a, a kut leh lamin microphone a keng a,
_"Tahchuan a leng ka thinlai hnemtu,_
_Bahsam lengin a nui hiau e,_
_Theih chang se, tawn leh zawng ka nuam ngei,_
_Suihlung rualpuia'n ka sawm ngei ang.."_ ti a, aw ki sang tak leh uar taka a zai laia, a zai ngaithlatute an lam suau suau te kha mitthlaah a lang nasa hle mai.
*_Super trio lam tel hmasa leh ang:_*
Zaithiam Robert-a album "Damlai thlan thim" (ni tain ka hria) hmasa ber kha Vanlalsailova khan a tlangzarh a. He hla (Damlai thlan thim) hi amah Joseph-a phuah ni tain ka hria. Hemi ṭum hian Sailova leh Roberta te nen an zaiho a.
_"Theih chang ve se, suihlungrual tein,_
_Tudang ngai lotea leng dunin...."_
tih hla an sak hnu phei chuan an lar zual hle a, an pathuma inkawp chho zelin; lengzem hla kalsan a, Pathian hla an sak hnu tun thlengin an inkawp zel a, tun dinhmun an lo thleng ta a ni. An ṭhian pathumte inhmangaih dan hi a thuk ka ti hle a, kei chauh ni lo, Mizo mipuiten hei hi chu an hmu a ni.
*_"Tahchuan a leng" leh a phuah chhan nu._*
A lar tirhna hla ti mai ang "Tahchuan a leng" bawk chu han sawi leh ila. He hla nalh tak hi Lungsena a awm laia a ṭhiannu (Apuii) a ni awm a. Apuii nen hian ral khat atangin ṭhian inkawm ngeih tak kan ni ve a, a felin, a rilru a zau hle a, amah hi hmeichhe fel tak a ni bawk.
Joseph-a thih thu ka hriat hnu deuh lawk khan ka zu bia a, kan inkawm hrep mai. An khuaa a Josepha nu hnathawka a awm avanga amah pawh a lo awm ve thute, a nu nen chuan office khata an thawhho thute,an khuaa an awm tawh loh hnuah pawh Josepha'n ngaipawimawha a tlawh ṭhin thu te, tunhnu thlenga an la inbiak ṭhin dan te leh thil hrang hrang min lo hrilh luam a ni.
*_Amah - Apuii kamchhuak chu:_*
Joseph-a chungchanga kan inkawmnaa a sawi ṭhenkhat hetiang hian ka lo dah chhuak ang e.
*_"...Ka tana mihlu berte zing ami a ni ka ti lo thei lo, tu tan pawh min hmangaihtu, min ngaihsaktu leh min hre reng thintute aia hlu hi an awm lo._*
*_Inngaihzawnna angin mi chuan min hria a, mahse khang thil kha chu hun kal tawh a ni a, amah hi a fel em avangin ani nen hi chuan tun thlengin thian tha tak kan ni a, lungngaihna, rilru natna leh harsatna te kan la in-share a, Pathian thu pawh kan sawi dun a, kan infuih tawn thin a ni._*
*_Tun thlenga hetianga thian tha kan nih theihna chhan hi ama fel vang a ni a, midang zawng zawnga a ka la hmuh loh - amaha ka hmuh chu, a zaidam leh dawhthei lutuk hi, a thinrim ve ngai lo._*
*_Kan inhriatna kum 20 chuang a ni tawh a, a thinrim hmel ka la hmu miah lo a, a ṭawngkam vin pawh ka la hrelo, a thinlung a na anih chuan a ngawi tawp mai thin, chutiang mi chu ania._*
*_A hringnun kawng bumbohzia leh hreawmzia ka ngaihtuahin ui hle mah ila, a chawl ta hi ka lawmpui a, chutih rual chuan a kalsan a fate hian rilru an tina ngawih ngawih a ni._*
*_Pathian hnena hawn a chak thin a. Mahse, amahin a lo pal chhuah tawh anih avangin, a fate a ngaihtuah em em a, hei vang hian dam ala duh thu min hrilh a. Fiamthu ti tak deuhin "Ka damrei pawh ka ring tawh lo" a tia hmanni lawka kan inbiak pawhin. Mahse, hetiang teh thut hi chu ka ring lo, a mak ka ti tawp a, min shock tawp a ni mai...."_*
*_A tawp nan._*
Hun khirh leh harsa tak kan tawng chho mek a ni. Tute pawhin midang chunga thleng hi kan chungah pawh a thleng thei tih hre chunga kan nun kan hman fimkhur a ṭul takzet a ni. Joseph-a ka lainat hle a, a chhungte ka tuarpui bawk a ni. A thihna avanga lungchhia a, ṭahna ruama ṭhu zawng zawngte LALPA'N thlamuanin, awmpui mawlh rawh se.
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: