Aizawl | May 15, 2023: Govt J Thankima College rama buai awm anga thu thang chungchangah, Govt J THankima College Principal Prof. JV Nunchunga chuan, "Vawiin khan ṭha takin Magistrate leh Police te ruahmanna angin thil singsak fel a ni. An bungrua pawh kan thiar chhuahpui a, an buhfai leina atan Magistrate, Princial leh a thawktute awm remchang ten kan thawh khawm a, Rs. 3000 kan hlan bawk e," tiin EXPLOREMIZORAM.COM a hrilh.
Prof. JV Nunchunga chuan, Youtube channel pakhata beih an nih chungchang sawiin, "Pi HD Ramfangzauvi hi kan haw lo a, ṭha te te in kan ti a nia. Rumliana khan a hre duh lo tlat a ni," tiin EXPLOREMIZORAM.COM a hrilh bawk.
Govt J Thankima College Principal chuan vawiin khan thuchhuah siamin, Youtube channel pakhata an college ram chungchang dik lo taka tarlan chu a sawifiah.
"He College ramchhunga an khawsa tlat hi College tan an hnawksakin Development an dal nasa. Ruihtheih thil leh thil dangah an fihlim lo. Hetianga an awm reng hi ram dan kalh tlat a ni." tiin thuchhuah chuan a tarlang.
"kha channel-ah khan Court thu kal lai mek ni chunga College lamin an mahni umchhuak lui tlat anga sawina a awm. Hei hi thudik chanve a ni. Eviction Order hi Court-ah an khing a, Court-in an khinna hi a hnawl. Chuvangin, dan mit atang pawhin Aizawl District Magistrate thu pek hi a dik thlap a ni." tiin thuchhauh chuan a tarlang a.
"Pi HD. Ramfangzauvin 'Police-in lehkha min signed luih tir' tih kha a dik lo. Police lamin ama chhuahna tur lam hawiin lehkha vawi khatmah an pe lo," a ti a, 'Lehkha kha Sap tawng a ni a, a awmzia ka hre lo' a tih pawh kha a dik lo. District magistrate lam lehkha reng reng hi Mizo tawng veka ziak a nih thu thuchhuah chuan a tarlang bawk.
Thuchhuah kimchang:
OFFICE OF THE PRINCIPAL
GOVERNMENT J. T¬HANKIMA COLLEGE
AIZAWL, MIZORAM. PIN: 796014
Principal: Prof. JV. Nunchunga, Tel : 0389-2915382
NAAC Grade A+ E-mail :principal@jtc.edu.in; Website : www.jtc.edu.in
C. 18015/2/2019-JTC, Dated Aizawl, the 15th May, 2023
OFFICE CIRCULAR
Mizoram sawrkar ram, kan College-in a luah mek chhung atanga Pi HD. Ramfangzauvi te chhuah tir an nih dawn chung chang leh YouTube channel pakhat “Rumliana Channel”-in hemi chung chang a thu tihchhuahah hian thu hriatchian loh a awm niin a lang a. Hetiang boruak karah hian kan College a thawk ten thu dik kan hriatchian a tul hle mai.
1. Kan College central campus ram chung changah hian Sawrkar leh Pi B. Lalhmangaihi te chu an inkhing a, thubuai chu a awm ngei mai.
2. Amaherawh chu he thilah hian Pi HD. Ramfangzauvi te hi an tel ve lo. Mihrang daih an ni. Pi HD. Ramfangzauvi hian helai hmun hi ram ruak emaw tiin In a sa ve ngawt zawk a ni. Hun lokal a, College/ Sawrkar min khingtu Pi B. Lalhmangaihi te nen tang dunin Pi B. Lalhmangaihi hian thutiam kam a neihpui ta zawk a ni. “Heti hian awm lui zel ula, Court-a ka chak hnuah In hmun tur ka sakthlak ve ang che u, a nih loh pawhin Compensation tam tak ka la ang a, ka sem ve ang che u” tiin. Chumi beisei chuan an khawsa lui ta ngat ngat a ni.
3. Kan College Campus chhungah hian Pi HD. Ramfangzauvi te chhungkua hi kum 2016 hma lam atang khan an khawsa tan tawh a. Hetianga Sawrkar rama a khawsak tlat avang hian College lam chuan sawrkarah thu kan thlen a. Aizawl DC Office atanga lo kal Zonal Magistrate, Local Council (Bawngkawn), Govt. J. Thankima College leh Revenue Department aiawh te hmaah kum 2016 March thla chhunga insawn chhuak turin ziakin Pi HD. Ramfangzauvi hian Date 25.2.2016 khan thu a tiam a ni.
4. A thutiam anga khawsa loin College ram chhungah a khawsa zui zel a, Aizawl DC lamin 29.3.2018 khan Eviction order pein ni 30 chhunga chhuak turin an ti a. A chhuak lo a nih chuan force hmanga nawrchhuah a nih pawhin engmah a sawi buai thei lo ang tiin lehkhain an hrilh.
5. He Aizawl District Magistrate thuchhuak hi Pi B. Lalhmangaihi te hian District Court-ah an khing a. Court chuan a stay ta a. Hearing te neih niin thu dik tak alan takah chuan he Court thuchhuak hi Senior Civil Judge chuan ni 6.6.219 khan a hnawl
6. Hetianga Court-in a hnawl takah chuan Aizawl District Magistrate chuan ni 30.3.2021 khan Show caused Notice an pe a. Ni 30 chhunga chhuak turin lehkha a hrilh a ni. Ni 30 chhunga a chhuak lo a nih chuan Force hmanga hnawhchhuah a nih pawhin engmah a sawibuai thei lo ang tih ziaka hrilh a ni. Heti chung pawh hian a la chhuak duh chuang lo.
7. Date 16.9.2021 khan Eviction order an pe nawn bawk. A la chhuak duh chuang lo a,
8. Date 31.3.2023 khan Eviction Notice an pe leh a, ala chhuak duh chuang lo.
9. Date 10.5.2023 khan Eviction kalpui a nih dawn thu, hmai hmaa hrilh tur leh May ni 15, 2023-a a chenna in tihchhiah a nih dawn thu leh chumi hmaa lo inthiarchhuak tura final warning pein Executive Magistrate/SDC, Aizawl chu Pi HD. Ramfangzauvi hnenah a kal a. Hmaichhanah chiang takin a hrilh.
10. He College ramchhunga an khawsa tlat hi College tan an hnawksakin Development an dal nasa. Ruihtheih thil leh thil dangah an fihlim lo. Hetianga an awm reng hi ram dan kalh tlat a ni.
11. Rumliana YouTube channel-ah khan thu belhchian dawl lo a awm nual
a. Pi HD. Ramfangzauvin “Police-in lehkha min signed luih tir” tih kha a dik lo. Police lamin ama chhuahna tur lam hawiin lehkha vawi khatmah an pe lo.
b. “Lehkha kha Sap tawng a ni a, a awmzia ka hre lo” a tih pawh kha a dik lo. District magistrate lam lehkha reng reng hi Mizo tawng veka ziak a ni
c. “Ziak leh chhiar ka thiam lo ka ni” a tih te kha a mak. A hming sign ngei kan nei
d. College lamin Bawngkawn Police te kan duh dan dana kan koh a, kan duh duh kan tih tir anga sawi te kha a dik lo. District magistrate lam thupek hmanga Executive magistrate rawn zui an ni zawk.
e. “Khawchhiat lai kher kher a inhnawhchhuah” tih te pawh kha thil intawng fuh mai a ni. Amah Pi HD. Ramfangzauvin ‘ka chhuak ang’ tia a intiam a\ang hian kum 7 a liam tawh a, Eviction Notice hnuhnung ber hun tiam pawh April ni 30 khan a liam tawh. Aizawl DC lam zahngaihna a tha em a, May ni 10, 2023 khan an lokal a, ni 5 hun pek belhin ni May ni 15-ah an kal leh dawn a, chuta ala in thiar chuak duh lo a nih chuan a bungrua leh insakna chungah engpawh thleng se engmah sawibuai tur a nei lo ang tiin final warning an lo pe a ni.
f. “Ka in halsakah min vau” tiin a sawi a, tuman an vau lo a, keini chuan sawrkar hmalakna kan thlir mai a ni.
g. Tin, Local Council lam emaw, Vantlang puihna dil miah lo angin Pi HD. Ramfangzauvi kha a insawi a, hei pawh hi a dik lo. Local Council chairman pawh a hmu a, “Min hum hram rawh u” a ti, mahse, Local Council chairman chuan “Hei hi chu District Magistrate thu anga thil kal, dan ang thlapa thil tih anih avangin keini kan inrawl thei lo” a lo ti thung zawk a ni.
h. Tin, kha channel-ah khan Court thu kal lai mek ni chunga College lamin an mahni umchhuak lui tlat anga sawina a awm. Hei hi thudik chanve a ni. Eviction Order hi Court-ah an khing a, Court-in an khinna hi a hnawl. Chuvangin, dan mit atang pawhin Aizawl District Magistrate thu pek hi a dik thlap a ni.
12. Chenna tur nei lo anga insawi siin a hmaa College lamin chenna tur kan pekah pawh a cheng duh lo a, BUSP pawh kan biaksak a, a duh chuang lo. A rilru hi hriatthiam a har hle.
13. Tin, he Rumliana channel-ah hian “Chanel neitu hian thu dik tak i hre duh a nih chuan khawngaihin mi lo be ta che, 9862772702 ah hian, College Principal ka ni e” tiin ka comment a. He YouTube channel hian thudik a hre duh lo a ni ang, chu comment chu a delete a, a vawi 2-na atan a thu ngai bawk ka post a, chubakah ‘Ka comment hi delete tawh lo bawk la aw’ tih ka belh a, chu pawh chu delete leh a ni bawk. A vawi 3-na atan “Ka comment I delete zel maw? Thudik I hre duh loah ka ngai e” tih ka post leh bawk. He YouTube channel hian tan lam neiin thu dik hre duh loin a comment hluam hluam a, Bawngkawn khawtlang dem ang deuh zawng ten a comment vak a, a zia lo hle mai.
He thilah hian College zirlai leh thawktute fimkhur ila, dan ang thlapa thil kalpui a nih avangin “Danin dik takin ro a rel ang” tiin lungmuang takin i awm ang u.
(Prof. JV. NUNCHUNGA)
Principal
Govt. J. Thankima College
Aizawl, Mizoram
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: