Electric Veng branch YMA buatsaih Career fair a hlawhtling

Aizawl | May 5, 2023: Electric Veng Branch YMA hnuaia Literature & Education Sub-Committee te buatsaihin Vawiin May ni 5 (Zirtawpni) Chawhma Dar 11 :00 khan Electric Veng YMA Hall-ah Career Fair neih a ni. Pu C.Lalmuanpuia, Bialtu MLA chuan Career Fair hi a hawng. YMA ten kan tu leh fate zirna kawng an zawh zel tur atan inkaihhruaina tha an chhawp chhuak chu lawmawm a tih thu leh zirlaiten hlawhtlinna kawng an zawh zelna turah ke pen pui a, ṭanpui an ngaihna laia ṭanpui zel chu kan tih makmawh a nih thu a sawi.

He hun hi zirlai naupangte an zirna kawng leh an hma hun atana an kal zelna tur kawng kawhhmuhna hun atan hman a ni.

Career Fair-ah hian Stall pariat (8) heng - Medical, Military, Engineering, Law, ITI, Polytechnic, Arts Stream, Science, te awmin veng chhung mi thiam te bakah ITI leh Polytechnic aṭangin mi thiam te sawm an ni bawk.

Women's Polytechnic, Aizawl zirlaite'n Career fair chhimtu zirlaite hriat tur pawimawh an hrilh | WPA hian admission an hawng mek a ni.

Electric Veng Branch YMA chuan YMA kumpuan ‘Ram leh hnam humhalh’ tih hlawhtlinna kawng khat atan zirna uar leh lehkha zir dan dik zawk inkawhhmuh hi a ngai pawimawh hle a. Pawl 10 leh 12 result nghak mekte tana lehkha zir chhunzawm dan tur inkawhhmuhna leh infuihtharna atan he Career Fair hun hi a buatsaih a ni. He hunah hian zirlai tel an ṭhahnem hle.

Zirlaite'n career fair an hlut hle!

Electric Veng Branch YMA chuan Career Fair a hlawhtling theih na tura sum leh paia ṭanpuitu Pu C Lalmuanpuia, Bialtu MLA chungah leh Samagra Shiksha, Mizoram te chungah lawmthu an sawi.

Electric Veng YMA Chanchinbu 'Tuitu' editor Vidpuia Hrahsel hnen atanga thu dawn danin, He career fair-ah hian Aizawl khawpui chhung veng hrang hrang atangin zirlai thahnem tak an kalkhawm a, an hma hun atana an zir duh tur leh an tana tha turte hrilhhriat an ni.

Zirlaite hian an hlawkpui hle niin thu dawn a ni a, zawngchhang tlak an ti hle.